Entamáu pola Asamblea Moza d'Asturies, les sesiones van celebrase a lo llargo de trés fines de selmana consecutives nel Manglar y Les Cigarrerres
26 may 2023 . Actualizado a las 05:00 h.«Xenerar una escena pa la narración oral n'Asturies» con una mirada puesta nel mundu que nos arrodia y nel fomentu de valores solidarios. Esi ye l'oxetivu de la cita col cuentu contáu que se va celebrar a lo llargo de trés fines de selmana consecutives en Les Cigarreres en Xixón y el Manglar n'Uviéu, que va trayer a Asturies a destacaos narradores del panorama nacional, con sesiones tamién pa públicu adultu y sol títulu Cuentos del mudu nel escaecíu noroeste.
Asina'l sábadu 27 de mayu, a les 23 hores, en Les Cigarreres de Xixón el gallegu Caxoto, ún de los máximos esponentes del puxante sector oral gallegu, va ufiertar tres una cena temática la so sesión De allá de donde yo vengo, basada nes vivencies del propiu narrador que presenta como «un viaxe a los raigaños cola mirada retranqueira de quien yá empieza a tar un poco de vuelta de too… ensin faltar a la verdá». El mesmu Caxoto amenizará a otru día, domingu 28, tamién en Les Cigarreres un vermú familiar col espectáculu pa tola familiar Cuentos a pie de calle, que presenta como una miscelania de cuentos de mieu, otros cuentos llenos de fantasía o cuentos tradicionales, perfecta «pa escuchar sentáu col culu nel suelu y los pies como los indios».
La fin de selmana del 3, 4 y 5 de xunu va ser la vez de la tamién gallega Vero Rilo, quien va ufiertar el día 3 de xunu a les 23 hores, el so espectáculu Ellas, una propuesta basada n'hestories de vida de trés muyeres conectaes ente sí al traviés de cuentos llenos d'amistá, humor, erotismu y resistencia. El sábadu 4 de xunu en Xixón y el domingu n'El Manglar d'Uviéu, dambos díes a les 12.30 hores, Rilo va ufiertar la so sesión familiar Y a ti… ¿Qué te contaban?, una risondera propuesta pa grandes y pequeños con fuerte presencia de cuentos de los de tola vida.
Por fin el 9, 10 y 11 de xunu llega la vez pal asturianu David Acera. Acera, quien foi escoyíu como Narrador Inauditu nel Maratón de Cuentos de Guadalaxara, la principal cita col cuentu contáu del nuesu país. Acera va ufiertar per primer vegada'l 9 de xunu, a partir de les 23 hores, los sos Cuentos Sacrílegos (un poquito nada más), una propuesta risondera ya irreverente. El sábadu 10 de mayu en Xixón y el domingu 11 n'Uviéu, dambes sesiones a les 12.30 hores, va ser el momentu pa la sesión pa grandes y pequeños Los cuentos de Acera, un espectáculu nel que l'asturianu promete facer «lo que-y sala del cuentu» pa ufiertar una sesión cambiante y afecha a les apetencies del públicu presente en cada momentu.
Esta programación ye posible gracies a la organización de l'Asamblea Moza d’Asturies y la collaboración de Les Cigarreres, El Manglar, La Palabra Dicha Asociación Cultural, L'Axencia Asturiana de Cooperación al Desenvolvimientu, el departamentu de Cooperación del Conceyu de Xixón, la ONG Matumaini y el Festival Tibleus que tolos años celebrar en La Pola (Somiedo) y qu'asume esti programa como una suerte de preludiu de la so cita añal que va ver la lluz los próximos 23, 24 y 25 de xunu.