Los casos con dalgún tipu de midida xudicial aumentaron l'añu pasáu
01 jun 2023 . Actualizado a las 05:00 h.L'añu pasáu aumentaron n'Asturies los casos de violencia machista, más bien aumentaron los casos nos que se tomó dalgún tipu de midida xudicial, aquellos nos que se rexistraron muyeres con dalguna midida cautelar o orde de protección polos malos tratos inflixíos contra elles poles sos pareyes o ex-pareyes. Fueron en total 713, y eso supón un aumentu del 33%, cuasi un terciu más qu'en 2021. Son les cifres detallaes pol Institutu Nacional d'Estadística.
El INE detalló que nesti recuentu inclúyense tolos actos de violencia física o psicolóxica, incluyíes les agresiones a la llibertá sexual, les amenaces, les coacciones o la privación arbitraria de llibertá, que fueren inflixíes contra una muyer per parte del home que seya o fuerañe la so pareya o ex-pareya».
En númberos puros trátase de 713 víctimes contabilizaes n'Asturies. D'elles 20 yeren menores d'edá; anque la estadística constata una medría xeneralizada en tolos grupos d'edá. Con too, el grupu d'edá nel que se rexistraron más casos de violencia machista son ente los 25 y 44 años, un total de 413 episodios. Tres los xuicios fueron condergaos 894 homes, 128 más que l'añu anterior.
Magar esta fuerte medría, la tasa de muyeres víctimes de violencia machista foi nel Principáu de 1,5 por cada mil muyeres de 14 y más años, la mesma que nel conxuntu del país, onde'l númberu de víctimes aumentó un 8,3 por cientu, hasta 32.644.
Violencia doméstica
Tamién se recueyen les cifres de la denominada violencia doméstica, la que puede ser exercida tanto por homes como muyeres contra familiares (sacante la pareya o la ex-pareya). Nesti puntu n'Asturies contabilizáronse 187 víctimes con orde de protección o midíes cautelares, 32 menos qu'en 2021, lo que supón un descensu del 14,6 per cientu.
D'esi total, 107 víctimes yeren muyeres, un 20,1 por cientu menos, y 80 yeren homes, un 5,9 por cientu menos.