La Universidá d'Uviéu espón na casa de cultura una serie d'imáxenes d'altu valor históricu pertenecientes al fondu del Institutu de Patrimoniu Cultural d'España
02 jun 2023 . Actualizado a las 05:00 h.Un percorríu pela hestoria visual del pasáu del conceyu de Colunga de la mano del fotógrafu alemán Otto Wunderlich. Esti ye'l puntu de partida de la nueva esposición de la Universidá d'Uviéu Colunga nel pasáu. Memoria ya imaxe na fotografía de Otto Wunderlich, que puede visitase dende'l 1 hasta'l 25 de xunu na sala d'esposiciones de la Casa de Cultura de Colunga. La muestra foi inaugurada esti xueves por María Pilar García Cuetos, vicerrectora d'Estensión Universitaria y Proyección Cultural de la Universidá d'Uviéu, y Sandra Cuesta, alcaldesa del Conceyu de Colunga.
La vicerrectora enmarcó esta esposición nueva dientro de la estratexa UO Territoriu, una prioridá de la institución académica, que pretende afitar la presencia de la Universidá d'Uviéu n'actividaes, de tou tipu, tamién culturales, fuera d'aquelles llocalidaes nes que s'alluguen los sos campus. «El conceyu de Colunga foi históricamente, por razones bien variaes, un territoriu nel que numberosos viaxeros y personalidaes averáronse tanto al so patrimoniu natural y cultural, como a los sos habitantes», dixo García Cuetos.
Esi foi'l casu de Otto Wunderlich, nacíu en Stuttgart y que llegó a España en 1913 por motivos llaborales. En 1917, Wunderlich empecipió'l so llabor como fotógrafu. Comercializó la so obra al traviés de series de postales y fototipies qu'amosaben paisaxes y monumentos del nuesu país, qu'editó en diversos medios, y desenvolvió proyectos pa destacaes empreses. Tamién llevó a cabu obres más personales, como les que constitúin el so legáu sobro'l conceyu de Colunga, qu'agora puede visitase na casa de cultura.
Ún de los sos fondos más relevantes, y que se guarda na fototeca del Institutu de Patrimoniu Cultural d'España (IPCE), ye precisamente esi conxuntu de fotografíes sobro'l conceyu colungués. Especialmente interesante ye la serie fotográfica que dedicó a Llastres y La Isla, llocalidaes del conceyu.
Les imáxenes que la integren constitúin documentos de gran valor pa recuperar la memoria, el pasáu y la historia del conceyu, que s'amuesa nun momentu nel qu'inda permanecía estrechamente venceyáu a la cultura vernácula y a la economía que la caracterizó antes del so desenvolvimientu turísticu y con tola potencia de la so guapura paisaxística. Xunto a personaxes llocales y l'arquitectura tradicional, se documenta coles mesmes la presencia de los primeres visitantes y les edificaciones qu'alzaron.
«Axuntar estes imaxes nuna esposición supón non solo averar a los habitantes del conceyu al so pasáu y a la memoria de la so xente y el so patrimoniu cultural y natural, sinón tamién recuperar con ello una identidá que, entá güei, resístese a ser desplazara pol desenvolvimientu d'una economía turística emerxente», destacó la vicerrectora.
Coles mesmes, el conceyu de Colunga, cola so nueva realidá de territoriu d'acoyida y la so economía turística, ufiértase como un escenariu pa qu'esos nuevos habitantes na so mayoría temporales, y los visitantes qu'enllenen los sos monte y les sos sableres, conozan el legáu que dio forma a esi paisaxe que los atrai y a esa xente que los recibe. Magar ye cierto que los negativos calteníos nun ufierten una calidá homoxénea, el valor documental de toles imáxenes failes merecedores d'integrase na esposición.