La xugadora, que trabaya como Policía Llocal n'Uviéu, vivió dos ascensos a la máxima categoría, ún col Balonmano Gijón y otru col Morvedre
05 jun 2023 . Actualizado a las 22:12 h.La primer llinia hispanodominicana Débora Torreira ye'l primer fichaxe de Lobas Global Atac Oviedo pa encarar el retu de competir na Lliga Guerreras Iberdrola de balonmano femenín. Torreira llega a la capital del Principáu con una pervalible esperiencia na máxima categoría y con capacidá d'aportar enforma na defensa, una faceta clave pal entrenador, Manolo Díaz.
La xugadora, que trabaya como Policía Llocal n'Uviéu, nació en Santu Domingu (República Dominicana) va 32 años, pero a los ocho treslladóse cola so familia a Asturies, concretamente al conceyu de Corvera, onde empezó a xugar al balonmano. Vivió dos ascensos a la máxima categoría, ún col Balonmano Gijón y otru col Morvedre, y mientres l'últimu llustru xugó na Lliga Guerreras Iberdrola col Motive.co Gijón.
«Yera hora de cambiar d'aires, taba nuna posición cómoda», afirma Débora Torreira, qu'a la de fichar pol Lobas Global Atac Oviedo valora qu'agora va poder conciliar meyor el balonmano cola vida familiar y tamién col so llabor como axente de policía. «Voi poder compatibilizar el mio trabayu y tar col mio fíu más cera de casa», esplica la xugadora nueva del cuadru carbayón, que destaca qu'aterriza nun club «con una trayectoria bien bona y con un gran proyectu».
«Precisamente por eso quiero participar nél pa siguir faciendo historia», sorraya Torreira, que sabe que nel Lobas va tener d'afacese a «una Lliga bastante dura» la próxima temporada. «Pa tolos equipos que xuben el primer añu ye complicao. Hai que poner munches ganes pa poder facer frente a toles dificultaes que se presenten. Hai que remar toes a una pa intentar consiguir el nuesu oxetivu», señala.