El presidente del Principáu d'Asturies, Adrián Barbón, y el presidente de la Fundación «la Caixa», Isidro Fainé, roblen l'alcuerdu marcu que recueye la collaboración ente dambes instituciones en materia d'acción social, educativa y cultural
14 jun 2023 . Actualizado a las 10:11 h.El presidente del Principáu d'Asturies, Adrián Barbón, y el presidente de la Fundación «la Caixa», Isidro Fainé, axuntáronse n'Uviéu pa roblar l'alcuerdu marcu que recueye la collaboración ente dambes instituciones en materia social, educativa y cultural. El conveniu suscritu establez que la Fundación «la Caixa» va dedicar un total de 4 millones d'euros a acción social n'Asturies mientres 2023.
Ente los oxetivos marcaos nel conveniu, destaquen la collaboración pa la meyora de les condiciones de vida de la infancia más vulnerable, fomentar l'avieyamientu activu de les persones mayores, facilitar l'accesu al emplegu a colectivos desfavorecidos y velar pola atención integral a pacientes con enfermedaes avanzaes, amás de contribuyir al bienestar de persones con discapacidá o en riesgu d'esclusión.
El presidente de la Fundación «la Caixa», Isidro Fainé, aseguró que «ratificamos güei'l nuestru alcuerdu pa siguir impulsando'l desenvolvimientu social y humanu y el bienestar de tolos asturianos, especialmente d'aquellos que tán nuna situación más vulnerable. El nuesu compromisu col presente y el futuru de les persones ye la nuestra razón de ser, por eso vamos siguir desenvolviendo la nuesa acción social equí, poniendo'l focu nes actuaciones que tienen un mayor impactu tresformador pa la sociedá asturiana».
El presidente del Principáu, Adrián Barbón, tamién destacó'l compromisu que demuestra la Fundación «la Caixa» cola población más vulnerable y los colectivos que riquen mayor sofitu social ya institucional. «Una de les principales esmoliciones pal Gobiernu d'Asturies ye que tola sociedá pueda avanzar de manera equitativa, ensin que nenguna persona quede atrás, especialmente nun marcu económicu como l'actual, de gran complexidá», afirmó.