Ente los proyectos escoyíos hai aplicaciones pa móviles, sistemes de detección de cayíes o soluciones pal ameyoramientu del accesu de los mayores a les tecnoloxíes nueves
19 jun 2023 . Actualizado a las 17:20 h.El programa TIC Cecoec va financiar 26 proyectos, por un importe total de 278.000 euros, de pymes y autónomos pa impulsar el desenvolvimientu de soluciones tecnolóxiques y anovadores p'avanzar escontra un modelu d'atención nuevu nos cuidaos de duración llarga n'Asturies.
Esti programa ta impulsáu pol Llaboratoriu pa la Creación del Centru de Competencia pa la Economía del Cuidáu de Duración Llarga y l'Avieyamientu Activu (Cecoec), promovíu pola Conseyería de Derechos Sociales y Bienestar y les Cámares de Comerciu d'Avilés, Xixón y Uviéu.
Nos 26 proyectos tán involucraes 43 empreses, yá qu'a les 26 beneficiaries sumen otres diecisiete entidaes nes que se van testar o van ensayar les soluciones tecnolóxiques escoyíes. Ente los proyectos escoyíos hai aplicaciones pa móviles, sistemes de detección de cayíes y de monitorización non invasiva y soluciones pal ameyoramientu del accesu de los mayores a les tecnoloxíes nueves.
La promoción activa del anovamientu ye ún de los pilares del Llaboratoriu Cecoec, en que'l so marcu tamién se contempla la ellaboración d'estudios técnicos ya informes sobro les principales directrices de la planificación y normativa del sistema de cuidaos de duración llarga, según el desenvolvimientu d'acciones formatives, d'acompañamientu y asesoramientu a profesionales y entidaes del sector.
El llaboratoriu, que cuenta con financiamientu européu al traviés de los Fondos Next Generation, ye un exemplu» de collaboración público-privada y busca convertir al Principáu «en referente européu n'anovación en cuidaos de duración llarga y avieyamientu activu», informa Efe.