La muestra, abierta al públicu hasta'l 29 de setiembre, reflexa l'arte rupestre n'acuarela
25 jun 2023 . Actualizado a las 05:00 h.Más d'una ventena de cuadros con representaciones de cueves asturianes y d'otros sitios de la Cornisa Cantábrica y Francia formen parte de la esposición Nes redes de la Prehistoria, qu'esti xueves inauguró nel Centru d'Arte Rupestre Tito Bustillo'l director xeneral de Cultura y Patrimoniu del Principáu, Pablo León, acompañáu del artista Ludovico Rodríguez Liaño, guía de cueves con arte rupestre de Cantabria mientres más de 35 años.
Hasta'l próximu 29 de setiembre va poder visitase esta esposición que reflexa l'arte rupestre en papel acuarela con manos en negativu, antropomorfos, caballos y otres figures y representaciones presentes na Prehistoria, y los díes 22 de xunetu, 19 d'agostu y 16 de setiembre va haber visites guiaes a Nes redes de la Prehistoria con Ludovico Rodríguez Liaño. La muestra inclúi amás una colección de marcapáxines encuadraos sobro más d'un centenar de cueves con arte rupestre de tol mundu.
Más de 30 esposiciones al llombu respuenden pola idea de Rodríguez Liaño de Prehistoria cercana y abierta, pero tamién abrasadora y misteriosa, que fai tar atrapáu Nes redes de la Prehistoria». La so esperiencia y pasión pol arte rupestre lleváronlu a esperimentar col papel acuarela como fondu, intentando reproducir el mugor de les cueves. Tamién s'interesó pol soporte del arte rupestre, creando obres de piedra sobro madera como les que formaben parte de la so amuesa Amanecer en lluces y solombres que yá se pudo ver en 2019 nel Centru Tito Bustillo.
«Prehistolego» y talleres pa públicu familiar esti branu
Nel Centru d'Arte Rupestre tamién permanez abierta l'amuesa Prehistolego, con seis escenes tematizaes sobro los conxuntos artísticos de la Cueva Tito Bustillo, una reproducción del covarón o una escena de la redolada del equipamientu construyíes con pieces Lego pola Asociación Asturbrick. L'accesu a les esposiciones temporales ye gratuitu cola entrada al equipamientu.
Visites guiaes
Esti branu va haber amás visites guiaes a la esposición permanente del centru y talleres pa públicu familiar, con temátiques distintes cada mes: en xunu, Recoyer pa crear, pa fabricar marcapáxines aprovechando los recursos de la nuesa redolada y conocer la manera de vida sostenible de los nuesos antepasaos; en xunetu, Prehistopintura, pa imitar l'arte prehistóricu; n'agostu, Antropomázcares, pa descubrir cómo los homes y les muyeres del Paleolíticu Cimeru se representaben a sí mesmos; y en setiembre, El Collar de la tataratatara… güela, nel que decorar abalorios similares a los utilizaos na Prehistoria. Pal públicu infantil ufiértase'l taller Pequeños artistes de la Prehistoria, nel que los participantes pueden esperimentar con aerógrafos, pigmentos y piedres de colores.
Cursu d'investigaciones nel valle del Sella
El Centru Tito Bustillo volverá ser la sede del cursu del cursu 150 años d'investigaciones prehistóriques nel valle del Sella del 12 al 14 de xunetu, qu'entama'l Centru Axuntu de la UNED d'Asturies, patrocina'l Conceyu de Ribeseya y nel que collabora'l mesmu Centru d'Arte Rupestre y la Conseyería de Cultura, Política Llingüística y Turismu.