La ufierta recibe una gran respuesta y prácticamente ta tol cupu cubiertu
07 jul 2023 . Actualizado a las 17:16 h.La Conceyalía de la Mocedá, al traviés del programa Corresponsables, pa la conciliación de la vida familiar y llaboral punxo en marcha distintos campamentos de branu gratuitos, na zona urbana y rural, pa los meses de xunetu y agostu, con una amplia ufierta cultural, deportiva y d'ociu pa los más pequeños que facilite la conciliación de la vida llaboral y familiar, dirixíu a neños, neñes y adolescentes, d'ente 4 y 14 años. En global ufiertáronse diez veces y 860 places, pudiendo los participantes inscribise en más d'unu.
Con éses ta previsto la celebración de dos campamentos na zona rural, unu d'ellos en La Güeria, del 17 al 21 de xunetu, y otru en Santa Bárbola, del 24 al 28 de xunetu, con 30 places cada unu. Dambos sumen a los campamentos urbanos de día que s'entamen nos meses de xunetu y agostu, con periodicidá selmanal, en Blimea (30 places per vez selmanal), Sotrondio (30 places per vez selmanal) y L'Entregu (40 places per vez selmanal).
Según esplicó la conceyala de la Mocedá y teniente d'alcalde, Cintia Ordóñez, «trátase d'una ufierta bien completa pa tol branu, que se financia col Plan Corresponsables del Ministeriu d'Igualdá, con una gran respuesta de participación y prácticamente toles places cubiertes a día de güei».
Amás, va celebrase un taller d'acuarela'l sábadu 8 de xunetu, a les 12 hores, nel centru social de La Cerezal pa neños de más de cuatro años, y tamién se va entamar l'actividá lúdica Perdíos per La Güeria, el sábadu 22 de xunetu, a les 12 hores, pa neños d'ente 4 y 16 años.
Per otru llau, les canches deportives de los colexos Rey Aurelio, en Sotrondio, y El Coto, en L'Entregu, van permanecer abiertes nos meses de xunetu y agostu, de llunes a vienres, de 10 a 21 hores, pal esfrute del ociu per parte de neños, neñes y adolescentes pa que puedan xugar o practicar cualquier actividá deportiva cola ventaya de contar con una cubrición na que guarecer del sol o del agua según seyan les condiciones climatolóxiques.
L'apertura d'estes instalaciones vien realizándose dende va dellos años coles mires d'apurrir a los más nuevos d'un espaciu polivalente, ampliu y seguro nel que poder esfrutar del tiempu llibre y d'ociu coincidiendo colos meses branizos y la inactividá académica nes aules.