Tamos a tiempu de parar la intolerancia y la barbarie

AGORA

Carmen Moriyón, alcaldesa de Gijón, preside la primera reunión del Gobierno tripartito.
Carmen Moriyón, alcaldesa de Gijón, preside la primera reunión del Gobierno tripartito.

09 jul 2023 . Actualizado a las 05:00 h.

El pautu de la vergoña en Xixón ente’l PP, Foro y Vox llevó per delantre al candidatu de Foro a l’alcaldía d’Uviéu, Carlos Suárez, que lu tacha d’un llamentable engañu «ensin sentíu»; al vicesecretariu d’Estratexa, José Suárez Arias-Cachero, que camienta que ye un pautu infame dir de la mano del fascismu que «viola’l programa, los principios y l’espíritu de Foro Asturies» y al empresariu Inaciu Iglesias, que diz que l’acuerdu de la vergoña ye «incompatible» cola igualdá, dignidá y cola defensa del asturianu.

La presidenta de Foro, la señora Moriyón, l’actual alcaldesa de Xixón, dexó de llau un derechu constitucional y la so pallabra dada de que xamás gobernaría con Vox, nun permitiendo que’l partíu ganador, el PSOE, garre l’alcaldía porque la «so pallabra nun val más que los xixonenses». Asina ye la hipocresía de la derecha. Ensin dulda, quien traiciona a la so pallabra val mui poco. Moriyón, ante’l revuelu social, atrévese a dicir que «el mieu y la desinformación pa intentar desfacer un resultáu democráticu, son ruinos y mezquinos». Lo único que ye ruino y mezquino ye la so actitú, anque nun se diferencia de la postura del PP, porque n’otres comunidaes nun tienen nengún problema n’usar la llingua propia (dao que nun lo consideren un asuntu ideolóxicu, un inventu o una imposición), ensin embargu, n’Asturies, el mesmu PP refuga la oficialidá, masque ye conocedor de qu’ensin oficialidá les nuestres llingües enfréntense a la minorización y al riesgu d’estinción. Los partíos conservadores ficieron oyíos xordos cuando'l presidente d’Asturies, Adrián Barbón, animó a les dereches a «axeitar el Estatuto á realidá d’Asturias y miyorar a protección das nosas llinguas».

Foro, PP y Vox quieren un imposible: «Ser y nun ser dalgo al mesmu tiempu y baxo’l mesmu aspeutu». Moriyón pretende tapar con ridícules desplicaciones les sos verdaderes intenciones. Nuna carta abierta, non solo asegura que Xixón nun va dexar de contratar a artistes qu'usen l'asturianu, sinón que refuga que vaya a producise un retrocesu nel ámbitu de la igualdá nel conceyu. L’alcaldesa de Xixón ha desplicar cómo va llogralo pactando cola ultraderecha que niega la violencia machista, el cambiu climáticu, desprecia’l coleutivu LGTBI y nagua por acabar cola realidá llingüística plural. Nesi sen, una de les primeres midíes de la conceyala de Vox de Xixón, Sara Rouco, que ta al frente de festexos, foi vetar a los artistes qu’empleguen l’asturianu. Visto lo visto, Moriyón yá nun engaña a naide; sábese que cambia de criteriu según-y convenga, polo que va permitir que l’usu del asturianu seya un elementu de controversia política. Pero non solo eso, va acabar col Xixón inclusivu, modernu y respetuosu, garante de derechos qu’a los progresistes tanto-yos costó llograr.

Andecha Astur llevó a Vox ante la Fiscalía por un delitu d’odiu. EscenAsturias, el principal representante de les empreses del sector de les artes escéniques asturianes, refuga la política cultural que promueve la censura nos procesos de creación d’un gobiernu autoritariu que «nun respeta derechos fundamentales como son la llibertá d’espresión, ún de los pegoyos incuestionables de la cultura». 

Per otru llau, seis entidaes culturales soscriben un manifiestu favoratible a la pluralidá llingüística nel conceyu: «Música n'asturianu SÍ». Asina la casi totalidá de la escena musical n’asturianu, dende Rodrigo Cuevas y Hevia hasta Rozalén, Rigoberta Bandini, Vetusta Morla o Desakato, anque hai munchos nomes y entidaes que faen música n’otres llingües, rubricaron esti manifiestu. Dicen que ye un ataque qu’afecta a tol sector musical, pero n’especial a los que s’espresen n’asturianu. Denuncien qu’atenta directamente contra l’artículu 20 de la Constitución, referíu a la llibertá d’espresión, la Llei de Contratación Pública, la Llei d’Usu y Promoción del Asturianu y el Plan de Normalización Llingüística de Xixón. Esixen que puea haber actuaciones d’artistes y entidaes qu’empleguen l’asturianu como llingua d’espresión y que se promueva «a traviés de Divertia y de les conceyalíes de Festexos, de Cultura y d'Educación». Al mesmu tiempu piden que les llibres opiniones de los artistes a favor de la oficialidá del asturianu nun afeuten nin lo más mínimo a la programación cultural y festiva de Xixón. Tamién esixen «una declaración per parte de l’alcaldesa de Xixón, na que refugue contundentemente les pallabres y les intenciones de la so conceyala de gobiernu y qu’asegure dafechu que nun va haber discriminación que vulnere los derechos». Per último, piden la dimisión de la conceyala de Vox.

Adrián Barbón ta indignáu por esta inalmisible actitú que supón una «involución y una amenaza» pa los artistes qu’empleguen l’asturianu. Per otru llau, los alcuerdos de PP y Vox nun se van llimitar a prohibir contratar artistes que s’espresen n’otres llingües que nun seya’l castellán, yá que vemos cómo nos conceyos que gobierna’l PP con Vox retiren obres de teatru y películes pol so conteníu sexual, sobre la Guerra Civil, el feminismu o la memoria histórica. Dexen mui claro cuál va ser la so ruta si lleguen a gobernar España. Pero entá hai más: tienen la intención d’acabar col Estáu de Bienestar; por esti motivu, pretenden derogar dalgunes de les midíes importantes qu'aprobó'l Gobiernu de Pedro Sánchez: la llei d'eutanasia, el despidu por baxa médica, la llei de memoria democrática, la reforma llaboral, la llei de vivienda, la llei del cambiu climáticu, los impuestos a les grandes eléctriques y a la banca, tasa Google y Tobin, ente otres. Adriana Lastra alvierte que peligra la mesma democracia. Nes manes de la ciudadanía ta parar la intolerancia y la barbarie nes elecciones xenerales. Hai tiempu pa torgar que les dereches nos retrotraigan a una sociedá del sieglu pasáu que nun respetaba los derechos nin les llibertaes.