El módulu d'albañilería del Taller d'Emplegu encárgase de los trabayos de restauración
12 jul 2023 . Actualizado a las 05:00 h.El Conceyu de Samartín del Rei Aurelio avanza na execución del proyectu de rehabilitación de llavaderos del que se ta encargando'l módulu d'albañilería del Taller d'Emplegu, que dexó la restauración a fecha de güei del llavaderu de Venturo, La Encarná y L'Acebal, qu'esta mañana foi visitáu pol alcalde José Ramón Martín Ardines. Anguaño ta actuándose nel llavaderu de La Envernal, pa siguir darréu n'otros dos más que tán pendientes de definir.
La restauración d'estos llavaderos ta realizándose en primer llugar por una cuestión de seguridá de la instalación que de resultes del pasu del tiempu presentaba distintos desperfectos, pero fundamentalmente «pa caltener y recuperar l'arquitectura tradicional del nuestru patrimoniu etnográficu», esplicó Martín Ardines, que señaló que «nesti procesu d'arreglu búscase siempres que seya posible la máxima fidelidá al proyectu orixinal de construcción».
Con calter xeneral, les obres que se tán llevando a cabu nos llavaderos céntrase na reposición de la cubrición y l'acondicionamientu de les parés, lo mesmo que de les distintes piles onde se llavaba la ropa y la fonte anexa que solía acompañar a estes construcciones y cualquier otra obra d'albañilería necesaria.
L'alumnáu que ta actuando nos llavaderos de la zona rural faen parte d'un módulu de 11 persones que reciben formación pal llogru d'un certificáu de profesionalidá na ocupación d'albañilería. A esti módulu súmense otros cuatro más dientro del Taller d'Emplegu, qu'en xunto sumen 65 puestos de trabayu pa un periodu d'un añu que vence n'avientu de 2023. La inversión xube a 1,3 millones d'euros, financiada pol Serviciu Públicu d'Emplegu del Principáu d'Asturies.
Per otra parte, esta intervención va tener continuidá en próximes feches con una segunda fase que va incluyir nuevos llavaderos, que nesta ocasión va ser llevada a cabu por alumnos de la Escuela Taller que ta en marcha nel conceyu dende abril.