Asturies promociona los sos recursos pa la observación de la naturaleza nel Reinu Xuníu

El Principáu promociona los sos recursos pa la observación de la naturaleza y la so ufierta d'ecoturismu nel Reinu Xuníu, cola so participación na feria Global Birdfair, celebrada en Rutland la fin de selmana pasada. Esti eventu, consideráu ún de los más importantes del sector a nivel internacional, axuntó a 300 espositores d'un centenar de rexones.

Asturies contó con un espaciu propiu pa esparder la so ufierta turística y informar sobre les polítiques de protección y caltenimientu del mediu ambiente n'usu. Alredor de 500 visitantes británicos y irlandeses interesáronse polos atractivos de la comunidá, especialmente pola ufierta d'observación de fauna y flora, amás de pola ufierta de vuelos directos.

Como novedá d'esta edición, el Principáu participó nes xornaes técniques entamaes na feria y realizó dos presentaciones p'averar la ufierta d'ecoturismu a los presentes. La primer presentación, fecha en collaboración cola Fundación Oso Asturias, llevó por títulu «Caltenimientu del Osu Pardu n'Asturies, el paraísu natural d'España». La fundación, dedicada al caltenimientu del osu pardu cantábricu y el so hábitat, apurrió información relevante sobre cómo participar de manera activa na protección d'esta especie. 

Na segunda sesión, «Observación d'aves n'Asturies, el paraísu natural d'España», realizóse un percorríu polos numberosos ecosistemes que favorecen la esistencia de casi 400 especies singulares, como'l frangüesos o'l treparriscos. 

La presencia del Principáu na segunda edición de «Global Birdfair» contribuyó a reforzar la posición de la comunidá como destín responsable y sostenible, únicu pa esfrutar de la naturaleza. Esta iniciativa forma parte de la Estratexa de Turismu d'Asturies 2020-2030, que persigue facer del turismu un motor de la economía y la sociedá.

---

---