La presentación oficial d'esta edición va tener llugar el martes 25
19 jul 2023 . Actualizado a las 05:00 h.El Tornéu BDO-Tenis Playa de Lluanco encarrera la recta final a la so XXXVI edición con tolos abonos vendíos pa les cuatro xornaes, del 29 de xunetu al 1 d'agostu. La organización va poner a la venta cien entraes pa cada xornada, con un máximu de cuatro per persona, una hora enantes del primer partíu, previstu pal sábadu 29 a les 19.30 hores.
La presentación oficial d'esta edición va tener llugar el martes 25, a les 12 hores, nel Muséu Marítimu d'Asturies, cola asistencia d'autoridaes y representación del patrocinador principal, BDO. Esi mesmu martes, a les 22.30 hores, TPA va emitir un documental de 40 minutos, una producción de Videoreport (Mediapro) sobre la historia del Tenis Playa.
Actividaes pa los neños
El comité organizador del Tenis Playa, formáu pol Conceyu de Gozón, Real Club de Tenis Avilés y Club de Tenis Lluanco, va averase al públicu infantil con una sesión de tenis nuna cancha especial que se va asitiar nel parque Zapardel, na que neños van recibir conseyos de los tenistes que van participar na xornada del sábadu.
L'actividá denomada «Tenis Parque Lluanco va celebrase'l domingu 30 de xunetu, de 11 a 13 hores. Ta confirmada la presencia de neños del Club Villa de Lluanco, a quien van poder sumase de manera gratuita dafechu tolos que tengan ente 4 y 12 años.
Otra novedá d'esta edición va ser la emisión en llinia, al traviés de la canal de YouTube y les redes sociales del Tenis Playa, d'un programa previu a la gran final del tornéu, que se va realizar en directo dende la redoma de la pista de La Ribera. L'espaciu va empezar a les 20.30, con una duración d'una hora y media. Van incluyise entevistes colos tenistes, resúmenes de les xornaes previes y reportaxes sobre Lluanco y Gozón.