Anque 1 de cada 4 nun sabe qué contestar porque nun suelen ver les noticies, pal 17,4% de los participantes na encuesta la invasión rusa d'Ucraína ye la noticia más importante del añu
08 ago 2023 . Actualizado a las 11:30 h.Los neños asturianos quieren ser futbolistes y profesores mentes que les neñes quieren más ser veterinaries y profesores según la XVII Encuesta Adecco 'Qué quieres ser de mayor'. Un añu más, los neños asturianos suañen con ser futbolistes (asina lo quier el 34,7% de los encuestaos), profesores (10,2%), policíes (6%), científicos (4,5%) y informáticos (3,9%); mentes que les neñes n'Asturies quieren ser veterinaries (25,4%), profesores (9,8%), policíes (6,2%), doctores y cocineres (4,5% caúna).
Pa la mayoría de los neños, el xefe meyor posible ye un amigu (14,2%), una opción que nin se contemplaba en 2020 y anguaño entra directa a la cabeza del ranking. Tamién quieren más ponese a les órdenes del so propiu padre o madre, al qu'escueyen el 8,3% y el 7,7% de los asturianos respectivamente, o del xugador de fútbol portugués Cristiano Ronaldo o'l so compañeru d'oficiu, l'arxentín leo Messi (dambos con un 6,5%). Tamién escueyen a un compatriota como xefe, el pilotu asturianu de Fórmula 1 Fernando Alonso (3,7%).
Les neñes tamién quieren como primer opción a una amiga o amigu pa ponese a les sos órdenes, (18,5%). Depués, les asturianes quieren trabayar pa la so madre (14,1%), pal so profesor o profesora actual (7,5%) y en cuartu llugar escueyen ser les sos propies xefes (6,9%). Zarrando'l top 10, escueyen a la presentadora de televisión natural de Xixón, Lara Álvarez (2,2%).
Anque 1 de cada 4 nun sabe qué contestar porque nun suelen ver les noticies, pal 17,4% de los participantes na encuesta la invasión rusa d'Ucraína ye la noticia más importante del añu. A muncha distancia (4%), la seca d'esta primavera en munches zones d'España, los terremotos de Turquía y Siria (2,9%) y el fin de les mázcares (2,7%), tamién merecen un apartáu destacáu na conciencia de los pequeños d'Asturies.
Tamién se-yos preguntó a los mozos d'Asturies qué productu venderíen si tuvieren que montar la so propia empresa. Los mozos escueyen montar un negociu de vienta de coches (7,5%), siguíu de vientes de coses de fútbol y tamién comida (empate a 6,4%).
Les moces, sicasí, montaríen primero una tienda pa vender ropa (17,2%), material escolar (5,4%), comida (4,3%) y llambiotaes (4,3%). Dambos sexos escueyen viaxar como'l meyor plan pa los sos años de xubilación, asina votó'l 16% d'ellos y el 17,2% d'elles; informó Europa Press.