Félix Fernández, ceador d'Acuto Xuegos: «Entamar n'asturianu habría tener el sofitu del Principáu»

L'avilesín Félix Fernández ye'l ceador d'Acuto Xuegos, un proyectu que busca la divulgación tantu del asturianu como de los xuegos tradicionales. Ente los futuros proyectos que tienen ente manos atópase'l primer xuegu d'autor n'asturianu, pal que van llanzar una campaña de crowdfunding.

—¿Qué ye Acuto Xuegos y qué oxetivos tien?

—Acuto Xuegos y Ediciones ye una iniciativa editorial nacida col envís principal d’espublizar xuegos n’asturianu, anque tamién espublizamos un xuegu en gallegu-asturianu y dos en gallegu. Tenemos tamién una estaya más secundaria d’Ediciones na que tratamos d’espublizar materiales que valgan pa la normalización del asturianu na vida familiar.

—¿Cuál ye'l procesu d'ellaborar un xuegu n'asturianu?

—Intentamos buscar que los xuegos tengan lo que llamamos «utilidá llingüístico». Ello ye que la reciella cuando xuegue seya consciente del usu del idioma pa la normalización del mesmu na so vida y al empar que valga pal deprendimientu de vocabulariu. Con esto, el procesu d’ellaborar un xuegu n’asturianu primeramente entama por mirar l’entornu infantil, los sos xuegos y sigui en como poder adaptar esa rialidá na edición y preparación del xuegu.

—¿Ye complicao facer xuegos n'asturianu?

—Nun ye una xera cenciella, porque a la fin tamos espublizando xuegos pa un mercáu mui pequeñu y ello conlleva dificultaes sobremanera nos costos de producción y na distribución. Apostamos tamién por facer productos de la mayor cercanía posible y esto per un llau dificulta la espublización de xuegos pero per otru ye una de les razones de ser d’Acuto y del sofitu que recibimos por parte de muncha xente na iniciativa. Polo que, la rimpuesta a la entruga ye que sí, pue afirmase que ye un poco complicao facer xuegos n’asturianu.

—¿Qué acoyida tienen ente'l públicu?

—Nesti sentíu tampos percontentos. Los xuegos, col tiempu, acaben escosándose. Anguaño, tenemos disponibles les últimes unidaes del ¡Echa al Trasgu! El Xuegu de la Mitoloxía Asturiana y venimos d’espublizar fai poques selmanes la segunda edición del Dominó d’Animales d’Asturies, un xuegu que la primer edición agotóse prontín y que pensamos que foi’l que más desapercibíu pasó de tolos xuegos qu’espublizamos pero qu’al empar pue que seya’l que mayor utilidá llingüístico tenga de los que ficimos hasta agora, por eso apostamos por esta segunda edición.

—¿Recibe sofitu per parte del Principáu pa siguir creando?

—Dende que nació Acuto nunca cuntamos con facer un proyectu que tuviera nel sofitu institucional ún de los pegoyos pa la so subsistencia. Creo que l’emprender n’asturianu en si mesmu ye lo que tien que tener el sofitu por parte del Principáu, y nun lo digo solo pa una actividá como Acuto sinon nun sentíu muncho más ampliu y xeneral pa toles iniciatives que ta habiendo en distintos ámbetos. P’Acuto, en concretu, nun ye tan importante que’l Principáu nos financie un porcentaxe de la espublización d’un xuegu como pue resultar de más valor que’l Principáu entame o nos dé la facilidá de tar n’eventos qu’axunten a los potenciales clientes con nosotros, los productores, o que faiga campañes pal consumu de productos n’asturianu, por poner tres exemplos de munchos otros que puen ponese. Inclusu facemos una cuarta propuesta: facilitar de la manera que consideren un serviciu de traducción o igua llingüística a les empreses, mesmamente a nosotros una institución pública negóse a facenos una traducción al gallegu-asturianu d’una páxina de llargu pa les instrucciones del ¡Echa al Trasgu! porque somos una iniciativa privada con ánimu de llucru, el plantegamientu llegamos a entendelu pero ¿éstes coses faciliten l’usu del gallegu-asturianu nun xuegu cola realidá sociu-llingüística na que ta’l gallegu-asturianu nesti casu? La rueda de la normalización llingüística hai qu’echala a rodar y lo que nuna situación ideal de normalización llingüística nun tien razón de ser, nuna situación inicial entiendo que si hai que sofitar en delles coses pa qu’esa rueda entame a xirar.

—¿En qué proyectos futuros ta trabayando?

—Tamos trabayando nun nuevu xuegu, un xuegu d’autor, el primeru n’asturianu, pal que vamos entamar una campaña de crowdfunding, y tamién nuna versión infantil d’un xuegu de preguntes y, esperamos, a mediu plazu poder espublizar una segunda edición del ¿Cuála ye? El Xuegu de Preguntes d’Asturies, un xuegu tipu Trivial pol que nos entruguen muncho.

---

---