Cocina con productos de temporada, la decoración de cerámica con plantes o la relaxación na naturaleza son dalgunos de los talleres de les fines de selmana
20 sep 2023 . Actualizado a las 11:35 h.El conceyal responsable del Xardín Botánicu Atlánticu de Xixón, Jesús Martínez Salvador, presentó esti llunes la programación pa esta seronda, con diverses actividaes pa neños y mayores como conferencies, llectures poétiques o talleres.
Too ello súmase al programa de visites guiaes del Xardín, gratuites col preciu de la entrada: visites diaries pa públicu individual y visites ornitolóxiques guiaes pol Colectivu Ornitolóxicu Carbayera del Tragamón, el segundu domingu de cada mes.
Les actividaes de la seronda dan empiezu'l próximu 28 de setiembre cola primera de les conferencies del ciclu De charra col Botánicu, que se celebren una vegada al mes na antigua Escuela de Comerciu. Nesta ocasión, la psiquiatra Marta Carmona, coautora de Malestamos, va falar de la necesidá de tresformar los barrios como vía para esfrutar d'una meyor salú mental.
A esta charra siguirá-y n'ochobre la del botánicu Luis Carlón, quien va encetar la importancia de Xixón na hestoria de la botánica europea, con especial atención a la figura y obra del botánicu xesuita Manuel Laínz, creador d’herbariu donáu a la ciudá y que se curia nel Xardín Botánicu. El ciclu de conferencies d'anguaño va rematar en payares con una charra a cargu del profesor de la Universidá d'Uviéu y director científicu del Xardín Botánicu, Borja Jiménez-Alfaro, que va xirar alredor de les característiques de les plantes d'altu monte.
El Botánicu va recuperar la celebración de Samaín, el próximu 1 de payares, con actividaes de mañana y tarde como collaborar na decoración al estilu tradicional, con enrestráu de maíz, ayos y cebolles, de la panera de la cortil o l'espectáculu protagonizáu polos personaxes máxicos qu'habiten el Botánicu, que se van dexar ver en llugares señalaos nun planu tando «garantizaes les sorpreses y más d'un plasmu». La celebración de Samaín va rematar con un amagüestu acompañáu de música tradicional y bailles.
Les actividaes tán incluyíes nel preciu de la entrada, magar se riquir inscripción previa llamando a la taquilla del Xardín. Amás, pal amagüestu ríquese inscripción al traviés de la web y el pagu de seis euros persona.
El Botánicu tamién celebra ente los díes 7 y 12 de payares la Selmana de la Ciencia, con un programa qu'inclúi entrada gratuita y actividaes tamién gratuites pa tola familia dedicaes a les estratexes de supervivencia del mundu vexetal.
N'avientu, como novedá, el Botánicu ufierta un taller empobináu a persones vieyes dientro de les actividaes empobinaes al públicu con diversidá funcional, programaes al traviés del Colectivu Berde. Tamién los sábados y los domingos va haber actividaes pa families y adultos sobre decoración cerámica usando plantes, la impresión testil, la relaxación na naturaleza, facer xabones en fríu usando elementos naturales o de cocina aprovechando los productos de temporada.