La llectura dramatizada de «Muero porque no muero», de Paco Bezerra, enllenó l'Auditoriu Teodoro Cuesta con un públicu entregáu que formó parte d'esta acción cultural, solidaria y pola llibertá
04 oct 2023 . Actualizado a las 05:00 h.«Ésitu absolutu» de la primer actividá de «Caja de Resistencia», la iniciativa puesta en marcha pola Conceyalía de Cultura del Conceyu de Mieres que tien como oxetivu impulsar la solidaridá, garantizar la llibertá y sofitar a los trabayadores de la cultura que sufren la censura pol autoritarismu cultural de dellos Gobiernos.
Esta acción arrincó esti pasáu sábadu en Mieres cola llectura dramatizada de «Muero porque no muero», de Paco Bezerra, obra censurada pola Comunidá de Madrid y que supunxo l'entamu de luxu pa esta Caja de Resistencia» que s’abrió a la participación ciudadana y que llogró una gran respuesta, permitiendo que 45 persones de Mieres y Asturies, pero tamién de distintes comunidaes autónomes (Madrid, Galicia, Castiella y Llión, Andalucía, País Vascu, Aragón, Cataluña y Estremadura) formaren parte d'esta llectura dramatizada.
Toes elles ?delles rellacionaes col mundu del arte y la cultura y otres ayenes a esti ámbitu- ensayaron dos díes embaxo la dirección de Bezerra y punxeron n'escena una llectura dramatizada que fixo emocionase, cimblar y esfrutar a un públicu qu'atarraquitó l’Auditoriu Teodoro Cuesta y que, tres la llectura, pudo entrugar y parolar col autor nun alderique nel que se faló de censura, de llibertá y de la importancia d'iniciatives como «Caja de Resistencia».
El balance d'esta primer actividá nun pue ser, por tanto, más positivu, según el conceyu. La respuesta del públicu, la valoración de les persones que participaron nesta actividá y qu'amosaron la so ilusión por formar parte d'esta acción cultural y reivindicativo, y l'implicación de Paco Bezerra -Premio Nacional de Lliteratura Dramática 2009- fixeron realidá l'ésitu d'esta iniciativa impulsada pola conceyalía de Rocío Antela, quien recordó que «detrás de cada cancelación hai un colectivu de trabayadores» y por ello, frente a la censura y los vetos, «ye necesario crear espacios seguros pa que la industria cultural pueda desenvolvese con llibertá».