La primera residencia lliteraria d'Asturies ye un proyectu del escritor Inaciu Galán
24 nov 2023 . Actualizado a las 17:31 h.Nos últimos años la lliteratura ta poniéndose en valir con formes nueves como les residencies lliteraries, que van abriéndose pasu nel panorama cultural pali que pali. Asturies nun cuntaba hasta agora con nengunu d’estos espacios dedicaos a da-y abellugu a escritores que, per un determináu tiempu, tienen accesu a un espaciu nel que poder apartase del so día a día pa facer lo que meyor saben, escribir, crear arte.
Xixón ye’l conceyu de referencia clara pa la cultura n’Asturies y más especialmente pa la lliteratura, con eventos de llarga tradición como la Selmana Negra y otros más nuevos pero de gran repercusión tamién, como la Feria del Llibru de Xixón (FeLiX) o’l festival POEX. Amás, la ciudá cunta con una importante rede de biblioteques, centros de cultura y tamién espacios privaos como cafés-llibrería. Too ello axunta en Xixón una amplia ufierta que permite falar d’un llugar onde l’entornu favorez la puesta en marcha d’una propuesta como la de la Residencia Lliteraria Xixón.
L’escritor y xestor cultural Inaciu Galán vivió nesti espaciu a lo llargo de cuasi una década y, agora, pon a disposición l’apartamentu pa la creación lliteraria dende Xixón, buscando tender pontes con otres lliteratures, otres llingües, otres cultures... «Quería crear un espaciu pa la creación lliteraria y pa construyir pontes ente la lliteratura asturiana y les lliteratures del mundu y pensé qu’esta podría ser una bona aportación», esplica Galán. Parte de la so biblioteca particular ta a disposición de los y les residentes que pasen una temporada escribiendo na agora Residencia Lliteraria Xixón. «La biblioteca disponible na Residencia Lliteraria Xixón permite conocer a fondu la lliteratura asturiana contemporánea, asina como averase a otres lliteratures del mundu, nella hai alredor de 2000 llibros n’asturianu, castellán, catalán, gallegu, inglés y otres llingües», diz Galán.
La esperiencia na residencia pasa tamién per organizar eventos fuera del espaciu pa dar a conocer a los autores residentes, en Xixón y n’Asturies. Pa ello, y d’alcuerdu colos escritores residentes y les sos circunstancies, entámense en cada visita presentaciones de llibros, charres col autor o autora y otres actividaes pa les que se cunta col texíu públicu y priváu de Xixón, asina como un taller de traducción de la obra del autor al asturianu, que va facese con escritores y traductores asturianos escoyíos pa cada autor y la so llingua de creación.
La Residencia Lliteraria Xixón atópase nel barriu L’Arena, a escasos metros de la playa más emblemática de la ciudá, San Llorienzo, y d’otros llugares urbanos y naturales que permiten a los escritores que s’agospien na mesma cuntar con sitios especiales onde inspirase y crear, incluyendo dellos museos. La zona urbana y el barriu vieyu, Cimavilla, tán tamién a poco más de diez minutos d’un prestosu paséu xunto a la mar.
La Residencia Lliteraria Xixón ye un espaciu urbanu pensáu pa la estancia d’escritores en periodos de tiempu nos que van dedicase a la creación lliteraria o la traducción de distintos xéneros. «Trabayamos pa convertinos nun puntu cultural de referencia nel mapa de les residencies que van acoyendo distintes ciudaes nos últimos años y pe ello tamos buscando alcuerdos con instituciones culturales d’Asturies y d’otros llugares d’Europa y del mundu».
La residencia permite atrayer talentos culturales a la ciudá de Xixón, al ufrir un llugar nel que trabayar cola proyección que supón la rede d’establecimientos y eventos públicos y privaos qu’alredor de la lliteratura se celebren nel conceyu. El proyectu ñaz de la xuntanza d’esfuerzos ente l’Asociación Nial Cultural y Cuatro Gotes Producciones, aportando la esperiencia en xestión cultural de dambes entidaes y de los sos equipos.
Esti mes d’avientu la Residencia Lliteraria Xixón va anunciar les sos primeres actividaes, tres un tiempu nel que se vien preparando l’espaciu y nel que tamién se celebró un concursu pa escoyer a los y les 24 autores clásicos de la lliteratura asturiana que van colgar nes paredes de la Residencia. Yá s’escoyeron y daránse a conocer nes próximes selmanes.