Abiertu'l plazu de matrícula pa nuevos cursos d'asturianu

La Voz

AGORA

Imagen de archivo del stand de Iniciativa pol Asturianu en la Feria de Muestras
Imagen de archivo del stand de Iniciativa pol Asturianu en la Feria de Muestras Iniciativa pol Asturianu

El periodu d'inscripción a la convocatoria fina'l 21 de xineru

08 ene 2024 . Actualizado a las 13:12 h.

Iniciativa pol Asturianu abrió esti llunes el plazu de matriculación p’apuntase a los nuevos cursos de llingua asturiana (nivel básicu 1 y nivel básicu 2) que van facese a distancia, al traviés d’una plataforma dixital. Los cursos van tener una duración de 36 hores llectives y van entamar el llunes 22 de xineru y van acabar a mediaos d’abril. La modalidá a distancia favorez la autoorganización del alumnáu y permite-yos dir faciendo les actividaes según l’horariu de caún, de manera mas conveniente.

El nivel inicial ta empobináu a persones ensin formación d’asturianu o con nivel baxu de conocencia. El nivel II ta empobináu a persones con una conocencia más fonda del idioma, que yá ficieren dalgún cursu enantes. En dambos casos, los estudiantes que lu superen van algamar una acreitación de l’Academia de la Llingua Asturiana.

El preciu de la matrícula ye de 60 euros. Les persones asociaes a Iniciativa pol Asturianu van beneficiase d’un descuentu y solo tienen qu’abonar 50 euros. Toles persones interesaes pueden asociase nel momentu de la matrícula y disfrutar d’esti descuentu.

El rexistru pal cursu puede cubrise nun formulariu na propia páxina web d’Iniciativa pol Asturianu, onde tamién s’alcuentren toles condiciones pal mesmu. El plazu d’inscripción acaba’l 21 d’esti mes.