Esta selmana entama’l procesu de negociación pa la reforma del Estatutu d’autonomía n’esclusiva, en principiu, sobre la cuestión llingüística. Un procesu que tien la intención d’introducir la oficialidá, tal y como establez la Constitución española nel so artículu 3.2: «Las demás lenguas españolas serán también oficiales en las respectivas Comunidades Autónomas de acuerdo con sus Estatutos».
El presidente Barbón convocó pa esti xueves pela mañana a tolos partíos, a escepción de VOX (que defende eliminar les autonomíes, ¿qué sentíu tendría negociar nada con quien niega la mayor?), a una xunta. Nesti conceyu va participar tamién el presidente de l’Academia de la Llingua Asturiana, Xosé Antón González Riaño, que toi seguru qu’apurrirá asosiegu y sobre too una bayurosa información contrastada sobre la cuestión llingüística dende distintos puntos de vista qu’estudió con fondura na so llarga carrera.
El presidente del PP d’Asturies, Álvaro Queipo, adelantó yá que la postura del so partíu ye la del 'non' a la oficialidá. Bono, en realidá diz «non a la obligatoriedá», lo que resulta contradictorio. La obligatoriedá esiste agora, ye constatable, y precisamente ta causada pola falta d’oficialidá.
Los usuarios del asturianu y del eonaviegu vivimos situaciones d’obligatoriedá por esa falta d’oficialidá. La obligatoriedá de nun poder usala en según qué ámbitos, de ser discriminaos por emplegala, de que nun tenga valir xurídicu... El propiu Queipo viviólo en dalguna ocasión al falar la so llingua materna na Xunta Xeneral y ver cómo-y intentaben torgar esi exerciciu, qu’habría ser de normalidá constitucional, de pura naturalidá y llibertá, pero que se fai cuasi imposible en según que llugares o situaciones pola falta d’oficialidá.
Álvaro Queipo y el PP d’Asturies tienen tol derechu a oponese a la oficialidá, ye lexítimo, anque ye un exerciciu dificilmente compatible cola defensa de la Constitución española y cola reivindicación que faen de l’acción de gobiernu del PP de Fraga, Feijoo y Rueda en Galicia, que desendolca la oficialidá y la normalización del gallegu dende va décades, ganando con mayoríes absolutes continuaes (¿nun-yos dará que pensar a los populares asturianos, tantes vegaes derrotaos nes urnes?).
Lo que nun ye almisible, ensin faltar a la verdá, ye dicir que la postura del PP d’Asturies del 'non' a la oficialidá ye la hestórica d’esta formación. «No nos hemos movido ni un ápice», diz Queipo sobre la negativa que planteguen a la oficialidá enantes de la negociación de les condiciones de la mesma. Pero esto nun ye asina, ¡vaya si se movieron!
Vayamos más d’un cuartu de sieglu atrás, al añu 1998. El PP, con Isidro Fernández Rozada y Mercedes Fernández 'Cherines' al frente, defendíen aprobar la oficialidá colos socialistes, a los que culpaben de que nun fuera posible.
Pero esti nun ye un fechu aislláu. El PP tien una llarga tradición de líderes en defensa de la oficialidá. Ye’l casu de Gabino de Lorenzo, ex alcalde d’Uviéu, que como cabeza de llista del PP al Congresu, centraba la so campaña de 2008 na defensa del asturianu y la oficialidá: «Después de 30 años, ya llegó el momento de ponernos de acuerdo y apoyar como se merece lo que nunca tuvo que ser un problema», dicía entós De Lorenzo.
Pero yá en 2005 Gabino teníalo claro: «Debemos defender lo nuestro por encima de todo, de lo contrario dentro de poco vamos a hablar gallego o catalán. […] Lo razonable es hacer lo que hicieron todas las comunidades con lengua propia, y no sé por qué aquí se discute todo el día sobre cuestiones que en otras regiones son elementos de consenso, de puesta en valor, de orgullo y un patrimonio cultural».
Apoyábalu tamién Isidro Fernández Rozada, que yera númberu dos de la llista. Sacaron naquelles elecciones 4 diputaos de 8 pal Congresu y un 41,58% de los votos, 289.305 papeletes. Resultáu nunca superáu pol PP n’Asturies.
Otra política entá n’activu, Pilar Fernández Pardo, güei diputada autonómica, entós cabezalera de la oposición en Xixón (la que meyores resultaos tuvo nel PP xixonés, por ciertu), defendía tamién la oficialidá naquel añu 2008 y nun lo quería allargar más: «Es el momento adecuado», esplicaba.
Pero ye que, amás, los dos únicos presidentes d’Asturies que tuvo’l centroderecha, Sergio Marqués y Francisco Álvarez-Cascos, dambos salíos del PP, defendieron la oficialidá. Anque ye verdá que Cascos algamó la presidencia con otra formación, defendió yá la oficialidá tando nel PP, cola famosa fórmula diferida. Lleváronla dambos nos sos programes electorales coles formaciones que fundaron a la so marcha del Partíu Popular d’Asturies.
Tamién los conceyales, los que más cerca tán del sentir de la xente, persones como’l triste ya inesperadamente recién fináu, Chema González, voceru del PP nel Conceyu de Llaviana, que dicía en 2006: «La llingua, cualquier llingua, ye la máxima espresión cultural d’un pueblu. […] Y hai que dicir yá qu’una llingua que nun ye oficial ta condenada a morrer. […] L’asturianu tien que ser oficial y el so usu tien que tar en tolos medios. Ye l’únicu mou de mantenelu vivu». Francisco Pérez Sanjurjo, conceyal de Cultura del Conceyu de Tapia pol PP, dicia en 2004: «Tendría que se recoyer la oficialidá nel Estatutu d’Autonomía pa nun perder lo que tenemos» y Roberto Pérez, alcalde del Conceyu de Piloña pol PP, dicía en 2006: «Toi a favor de la oficialidá cueste lo que cueste». Estos son namás unos pocos exemplos.
¿Pue dicise entós que’l PP siempres tuvo nel non a la oficialidá? De nenguna manera. Los sos líderes más esitosos nes elecciones defendieron esta midida constitucional, defendieron la oficialidá pa les llingües d’Asturies.
Ye momentu agora de que’l PP d’Asturies recupere esta tradición propia de más de 30 años de líderes favoratibles a la oficialidá y faiga propuestes pa buscar un consensu sobre la mesma, aportando la so visión y la esperiencia de tener gobernao en cásique toles comunidaes autonómes onde hai una llingua oficial: Galicia, Comunitat Valenciana, Illes Balears, País Vascu y Navarra.
Nun pueden dicir un non ensin poner sobre la mesa dalguna propuesta que permita entamar un diálogu democráticu. Álvaro Queipo tien la oportunidá de mostrar el so lideralgu nel camín hacia l’asturianismu que defende pal PP d’Asturies. Esto ye dificilmente creyible si se fai dende postures menos avanzaes sobre l’asturianu de les que tuvo nel pasáu la so organización con persones que nun se definíen como asturianistes.
Los resultaos electorales de los líderes populares a favor de la oficialidá demuestren que’l respaldu social ye evidente. Con timidez, de momentu, apaecen yá voces ente les bases del PP d’Asturies, pero tamién ente la intelectualidá de la derecha, reclamando la oficialidá. Hai que saber poner la oreya y como Fraga fixo va trenta años, liderar un cambiu social que ye yá un fechu. Lo contrario va ser echase nos brazos de los enredos antisistema y anti Constitución de VOX, entrar al so xuegu perversu y vese atrapáu por ellos.
El xueves veremos les espectatives que podemos tener sobre esta negociación. Yo siempres creo que les causes xustes acaben por abrise camín.