Con motivu del Día de les Fuercies Armaes, va a ser na plaza del Paragües con una folixa con pasucais, música, performances o xuegos tradicionales
23 may 2024 . Actualizado a las 14:43 h.Pacifistes y antimilitaristes van contraprogramar los actos n'Uviéu y Xixón con motivu del Día de les Fuercies Armaes. Va ser na Plaza del Paragües de la capital asturiana con una folixa pacifista que va entamar a les 12.00 hores y onde va haber pasucais, música, asamblees, performances, xuegos tradicionales...
La convocatoria ta entamada por Conceyu Abiertu pola Paz, y, d'esta manera, quieren contestar y criticar a los mensaxes de carrera armamentística y propaganda belicista que se ta viviendo nos tiempos postreros, señalando l'afianzamientu de la OTAN como cuestión clave en too esto. Nel manifiestu llanzáu, argumenten que «la fin de la Guerra Fría creó la falsa ilusión de que podríemos entrar nun mundu ensin bloques militares (...) Nada d'eso foi verdá. Al contrariu, surdió un desorde internacional que permitió l'apaición de conflictos nuevos y la cronificación d'otros, como'l de Palestina».
Conceyu Abiertu Pola Paz respuende asina a tolos actos de les Fuercies Armaes qu'estos díes tán enllenando les dos principales ciudaes d'Asturies y que tien opiniones estremaes na sociedá asturiana, que van dende una actitú positiva pa con ellos hasta la crítica por reapropiase d'un día de celebración «qu'habría ser de la bandera asturiana y non del exércitu del Estáu». Una crítica que tamién menciona'l manifiestu llanzáu pol colectivu, onde señalen que «casualidá o non, la fecha escoyida, el 25 de mayu, apaez cargada d’un valor simbólicu importante pal pueblu asturianu porque se conmemoren los fechos asocedíos énte la Xunta Xeneral en 1808, que representen la defensa de la so propia soberanía. Pero esto nun se celebra. Al revés, la conxunción d’acontecimientos va dar como resultáu la invisibilización d’una fecha cargada de llecciones históriques».