La investigación que dirixe'l profesor Miguel Calleja súmase a la celebración del milenariu d'esti monesteriu cola publicación de la monografía
29 may 2024 . Actualizado a las 05:00 h.El 31 de mayu del añu 1024 un pergamín yá casi milenariu recoyó la solemne dotación d'un monesteriu nel territoriu de Salas, nel llugar de Corniana. Fundóse como espaciu de retiru de la infanta Cristina, fía del rei Vermudo II y de la reina Velasquita. Y con aquel actu maxestosu dio empiezu la hestoria d'una institución onde la vida monástica duró hasta'l sieglu XIX, y que foi protagonista fundamental de la hestoria del cursu mediu del Narcea a lo llargo de los postreros mil años. Agora, el grupu d'investigación de la Universidá d'Uviéu Llaboratoriu de documentación histórica (DocuLab), col impulsu de la Fundación Valdés-Salas y el sofitu de la Fundación Banco Sabadell, llevó a cabu nuevos estudios sobre la hestoria de l'abadía que se recueyen nun llibru editáu por cuenta de esti aniversariu.
La nueva publicación ye una rigorosa reconstrucción de la etapa fundamental na trayectoria hestórica de l'abadía, que va dende la dómina de la so fundación nel sieglu XI hasta la so incorporación, a principios del sieglu XVI, a la Congregación benedictina de Valladolid, colo que se cubre asina'l periodu entendíu ente 1024 y 1536.
La obra partía de les investigaciones previes del profesor Calleja, coordinador del grupu d'investigación, qu'en 2002 yá publicara un primer llibru sobre'l monesteriu, una edición que ta escosada na actualidá. Los capítulos precedentes actualizáronse sobre la base de nueves aportaciones documentales inédites, ya incorpórense nuevos estudios de distintos autores que fortalecen l'enfoque multidisciplinar de la etapa medieval del monesteriu.
El llibru esplica en detalle'l protagonismu femenín nos tiempos de la so fundación y les sos rellaciones europees nos tiempos en que tuvo venceyáu a l'abadía de Cluny (Borgoña). Analiza tamién la organización interna de l'abadía y el so papel como gran propietariu y señor nel espaciu centro-occidental d'Asturies. Describe amás la construcción del conxuntu románicu y el bayurosu tresfondu cultural de les sos inscripciones en piedra y les sos escritures en pergamín. El volume desvela informaciones inédites sobre la violencia señorial exercida sobre'l monesteriu a la fin de la Edá Media y recueye, per primer vegada, el documentu pontificiu d'anexón a los benedictinos de Valladolid. Trátase d'una síntesis actualizada de la hestoria medieval d'esta fundación benedictina, basada nuna rigorosa investigación de les fontes orixinales y presentada con voluntá de llegar a un públicu ampliu.