La esposición de Lego, fecha por Asturbrick, puede visitase hasta'l 29 de setiembre
02 jul 2024 . Actualizado a las 17:28 h.El Parque de la Prehistoria de Teberga abrió esti 1 de xunetu al públicu la esposición El Legolíticu asturianu, una amuesa realizada pola Asociación Asturbrick que puede visitase hasta'l próximu 29 de setiembre.
El Legolíticu asturianu reproduz, al traviés de les figures de Lego y en seis diorames en distintos espacios del Parque, les instalaciones y la contorna natural del equipamientu; les actividaes realizaes polos nuesos antepasaos de la Prehistoria, como la caza o'l curtíu de pieles, y les cueves o cabanos nes que vivíen, amás d'oxetos, pintures y enseres del Paleolíticu.
Esti branu'l públicu infantil va dar rienda suelta a la so Creatividá Prehistórica al traviés de manualidaes o recetes coles qu'averase a esti periodu históricu nos talleres que s'entamen de llunes a xueves hasta'l 29 d'agostu; y va poder esfrutar de Meriendes con arte y realizar chapes o imanes tematizaos los domingos de xunetu a setiembre.
El públicu familiar podrá convertise en Cazadores de la Prehistoria y poner a prueba la so puntería con delles armes paleolítiques como'l propulsor y la azagaya los sábados de xunetu a setiembre. Amás, los díes 6 de xunetu y 10 d'agostu, vuelven les Nueches prehistóriques, un programa divertíu qu'inclúi acampada y espicha nel Parque, talleres temáticos, l'escape room La máquina del tiempu o una actividá de tiru con arcu y llanzamientu de azagayas.
Los visitantes tamién pueden ver la esposición Mensaxes nos abilsos. Arte esquemáticu en Fresnéu, centrada nes pintures esquemátiques de los abrigos de Fresnéu; participar nes visites a la Galería, l'espaciu museísticu del Parque, los vienres de xunetu y agostu; o sumase a los percorríos guiaos a la corralada d'animales, con gamu, venaos, caballos Przewalski y tarpanes, Uros de Heck y bisontes d'orixe européu, los domingos de xunetu a setiembre.