El conceyu va enllenase de planes culturales y gastronómicos mientres el 25 d'agostu
03 jul 2024 . Actualizado a las 12:52 h.Esta selmana, presentóse nel llagar de Cualloto'l nuevu cartelu del certamen del quesu Cabrales, que resalta'l productu y la etiqueta de denominación d'orixe del productu. El cartelu ye de Pedro Manero, diseñador gráficu.
El certame va celebrase'l próximu 25 d'agostu y como n'otres ediciones la selmana del certame va tar enllena d'actividaes culturales y gastronómiques venceyaes col quesu y la contorna.
Ente elles inclúyense una amuesa de la ellaboración artesanal del quesu, cates guiaes y exhibiciones de productos locales, embutíos y dulces típicos. Amás, el certame va cuntar con actuaciones de música, esposiciones y charres rellacionaes col quesu y la zona de Cabrales pa que tolos asistentes puedan esfrutar y conocer la riqueza de la zona.
Esti eventu, que se convirtió nuna cita ineludible pa los amantes del quesu y la gastronomía, destaca pola calidá y la tradición d'unu de los quesos más emblemáticos d'Asturies y del estáu español.
Anguaño, amás de les actividaes habituales, el certame tien un oxetivu ambiciosu: bater el récord Guinness de la puya del quesu Cabrales. N'ediciones anteriores, esti momentu xeneró gran espectación y algamó cifres impresionantes, superando esti récord n'otres cuatro ocasiones.
El Certame del Quesu Cabrales ye una celebración que va más allá d'una simple feria de quesos. Los queseros locales compiten pol prestixosu títulu de «Meyor Quesu Cabrales del Añu», un galardón que reconoz non solo la calidá del productu, sinón tamién l'esfuerzu y la dedicación de los productores. L'añu pasáu el ganadores fueron Guillermo Pendás y Rosa Bada de la quesería Los Puertos.
Cola presentación del nuevu cartelu y la edición de 2024 del Certame del Quesu Cabrales promete ser una celebración estraordinaria de la tradición quesera asturiana y un homenaxe al saber facer de los sos productores.