Asina ye Beaming, la revista dixital de l'artista uvieína multidisciplinar Beatriz Chaves
AGORA
Chaves tamién ye escritora y fotógrafa, disciplines nes que destaca con dellos premios y esposiciones
01 ago 2024 . Actualizado a las 11:50 h.El verbu 'beam' tien el significáu n'inglés (ente otros) de «sonrir de forma mui placentera» y el nome Beatriz vien a significar daqué como «persona que fai feliz a los demás». Baxo estes dos premises y les sensibilidaes artístiques de Beatriz Chaves nació Beaming n'avientu de 2023, una revista dixital n'inglés qu'axunta moda, arquitectura, fotografía y creatividá.
L'artista uvieína, que ye grauada en Llingües Modernes y trabaya como profesora nel rural asturianu, creó esta iniciativa que va yá pola so tercer edición col envís de compartir col restu del mundu la so visión creativa y artística, mesmo que dar voz a coses o persones rellacionaes coles estayes que recueye'l proyectu al traviés d'entrevistes y otros formatos. D'esta manera, destaquen les semeyes de detalles arquitectónicos, cuidando la guapura qu'escuenden en munches ocasiones elementos que vemos acaldía y que nun paramos a agüeyar da manera fonda.
Beatriz trabaya en delles disciplines porque l'arte cúrala, sálvala y fai que pueda espresase como ella ye realmente, anque esi enfotu polos detalles ye lo que se pudo ver na esposición Aleación de sueños y asfalto que s'espuso na Sala d'Esposiciones del Cibercentro n'abril d'esti añu. La obra espositiva basábase nuna esbilla de semeyes en blancu y negru de temática arquitectónica y urbanística sobre la ciudá de Nueva York, enfatizando enforma les solombres, testures y reflexos.
Pero Chaves, que tien na so creatividá un camín llargu por percorrer, destaca tamién n'otres estayes. En 2020, Chaves publicó'l so primer llibru (Hilos de voz, Ed. Camelot), una escoyeta de rellatos curtios y poesía n'español y n'inglés. Coles mesmes, en 2023, foi galardonada col XII Premiu Lliterariu de la Universidá d'Uviéu (categoría de Rellatu Curtiu), trayendo esta reconocencia la publicación de la so novela Al otro lado del mostrador (Serviciu de Publicaciones de la Universidá d'Uviéu). No que cinca a la fotografía, resultó premiada en delles ocasiones, con motivu del Concursu de Fotografía del Carné Mozu d'Asturies (2022) o recibiendo l'Accésit del XX Concursu de Fotografía Sol Cultural (2022).
A Beatriz Chaves, maestra de profesión, prestaría-y siguir probando coses nueves na so trayectoria profesional y nun descarta dexalo too pa poder dedicase a los sos intereses. Namás el tiempu dirá.