L'asociación denuncia «una situación inaceptable que se sigue allargando nel tiempu pese al compromisu manifestáu pola Conseyería»
19 sep 2024 . Actualizado a las 12:39 h.L'Asociación de Docentes d’Asturianu y Eonaviego/Gallego-asturiano (ADAE) denuncia que se cumplieron les previsiones que vien faciendo dende principios de xunetu. Les 13 vacantes de profesoráu d’asturianu que yá alvirtiera de que faltaben na convocatoria d’iniciu de cursu salieron finalmente’l martes pasáu nuna segunda convocatoria ensin xustificación nenguna, yá que la matrícula llevaba zarrada casi dos meses. Amás, falta por convocar la vacante del CEIP San Pedro de los Arcos d’Uviéu, que lleva reclamando tou esti tiempu. La plaza yá ta concedida pola Conseyería, mas nun da esplicación de la so ausencia nes convocatories.
Convocáronse tamién el martes pasáu 2 vacantes d’asturianu pa los Centros d’Educación de Persones Adultes. La esplicación dada dende Conseyería a los CEPAs que solicitaron vacante al entamu del cursu foi que tovía nun taba zarrada la matrícula, por embargu, na convocatoria d’iniciu de cursu salieron dos vacantes d’asturianu en CEPAs que nun teníen siquiera empezáu’l periodu de matrícula. Usáronse asina criterios estremaos nos que namás paez una estratexa d’aforru.
Va más de dos meses que l’asociación empezó a comunica-y a la Conseyería d’Educación que nes necesidaes provisionales faltaben 40 vacantes ente Primaria y Secundaria, na corrección del documentu siguieron faltando 30 places y na convocatoria d’iniciu de cursu nun se convocaron un total de 17 places. Estos datos, xunto a la convocatoria de les vacantes en primaria y nos CEPAs qu’ADAE señaló que faltaben por convocar, amuesen la intención consciente per parte de la Conseyería d’Educación por facer un recorte nes places de profesoráu d’asturianu. El profesoráu qu’acueye ADAE nun se conforma cola convocatoria de les places a cuentagotes teniendo en cuenta que se trata de necesidaes de calter estructural que yá se conocíen a principios de branu.
L'alumnáu d’asturianu volvió a empezar el cursu ensin profesoráu d’asturianu nos 17 casos mencionaos. Amás, ún d’estos centros va tar polo menos un mes ensin maestru/a. Los y les docentes a los que se-yos axudiquen eses places empiecen con desventaya al nun tener el tiempu necesariu pa preparar el comienzu del cursu. Esta ye, pa l'asociación, «una situación inaceptable que se sigue allargando nel tiempu pese al compromisu manifestáu pola Conseyera d’Educación y del Presidente d’Asturies pa col idioma y l’asignatura». Poro, dende ADAE piden que pasen a l’acción y demuestren con acciones lo que tienen prometío de pallabra.