La iniciativa busca potenciar la cultura audiovisual y fomentar les industries culturales asturianes
11 oct 2024 . Actualizado a las 05:00 h.Un premiu nuevu súmase a los entregaos pol Gobiernu d'Asturies, que ta acabante de convocarl primer Premiu de Guión Cinematográficu en llingua asturiana y eonaviegu. Un gallardón impulsáu pol Principáu pa fomentar la creación audiovisual y lliteraria nes llingües propies d’Asturies, ampliando asina’l repertoriu de producciones audiovisuales nestes llingües.
El Boletín Oficial del Principáu d’Asturies (Bopa) recueye la resolución definitiva qu’establez un plazu pa optar a esti gallardón, qu’acaba’l 29 d’ochobre. El guión que resulte ganador, que nun va poder tar rodáu dende’l momentu de la presentación na convocatoria correspondiente hasta la so resolución, va recibir un premiu en metálico de 6.000 euros.
El Premiu de Guión Cinematográficu tien como oxetivu premiar obres orixinales y inédites creaes pa llargumetraxes de ficción o animación. Con esta iniciativa, Cultura impulsa la creación de guiones cinematográficos orixinales n’asturianu o n’eonaviegu, promoviendo l’apoyu al sector audiovisual nel ámbitu del Principáu. Amás, busca ayudar al afianzamientu, arriquecimientu y prestixu de la llingua asturiana y l’eonaviegu, tanto dientro como fuera del territoriu asturianu.
Ente los aspectos que’l xuráu encargáu de la valoración de los trabayos presentaos a esti certame va tener en cuenta, destaquen l’interés y contribución al arriquecimientu de la cultura audiovisual asturiana, la calidá artística de la propuesta, amás de la riqueza y adecuación llingüística en coherencia col desenvolvimientu de la obra.