L'actu sirvió pa presentar 'Per toa tierra', una antoloxía lliteraria del fenómenu migratoriu
15 may 2025 . Actualizado a las 09:05 h.La 46 edición de la Selmana de les Lletres Asturianes echó'l cierru esta tarde nel Centru Asturianu de Madrid con un actu presidíu pola conseyera de Cultura, Política Llingüística y Deporte, Vanessa Gutiérrez. L'actu sirvió pa presentar 'Per toa tierra', una antoloxía lliteraria sobre la emigración asturiana, eidtada pela conseyería y que xune autores clásicos y actuales.
El volume recueye una muestra amplia de testos lliterarios que narren el fenómenu migratoriu dende la perspectiva asturiana, con obres de poesía, narrativa, cómic y crónica. L'oxetivu ye dar cuenta del caláu que la emigración dexó na cultura asturiana, especialmente ente los sieglos XIX y XX, cuando más de 300.000 persones salieron del país en busca d'un futuru meyor.
Dende Pepín de Pría, Alfonso Camín o Eva Canel, hasta voces actuales como Paquita Suárez Coalla, Xabiero Cayarga o Alfonso Zapico, la antoloxía dibuxa un mapa lliterariu de la diáspora, dende l'América de les grandes migraciones al éxodu interior a ciudaes como Madrid.
El llibru tamién rinde homenaxe a les publicaciones de los centros asturianos del esterior y a figures clave como Cosme Sordo, Carmen Tineo o'l Maestru Casanova.
L'actu de presentación, preparau por Arantza Margolles contó cola participación del director xeneral d'Acción Cultural y Normalización Llingüística, Antón García; el presidente del Centru Asturianu de Madrid, Vicente Menéndez; la secretaria de la institución, María Pilar Riesco; y el escritor Xosé María Rodríguez, miembru del Conceyu d'Asturies en Madrid.
El Principau recuerda qu'el protagonista d'esta edición de la Selmana de les Lletres ye Xosé Álvarez, Pin, autor que representó con ironía y fondura la vida de los emigrantes asturianos, especialmente dende Madrid, onde vivió y escribió parte de la so obra; informó Europa Press.