Marisa Valle Roso homenaxea a les muyeres de la mina nel so nuevu single, La Carbonera
AGORA
Con esti emotivu cantar, rinde homenaxe a les muyeres que, mientres xeneraciones, trabayaron o vivieron en redol a la minería
16 may 2025 . Actualizado a las 13:58 h.La cantautora asturiana Marisa Valle Roso presenta La Carbonera, el cuartu adelantu del so próximu álbum, que va publicase na seronda. Con esti emotivu cantar, rinde homenaxe a les muyeres que, mientres xeneraciones, trabayaron o vivieron en redol a la minería. Davezu escaecíes pola hestoria oficial, l'artista reivindícales como verdaderes heroínes de la escuridá, pilastres fundamentales d'un sector clave na evolución de la sociedá asturiana.
El cantar ta inspiráu nuna asturianada tradicional, conocida tamién como La Carbonera. A lo llargo del cantar, Marisa Valle Roso caltien l'espíritu melódicu del folclor asturianu, fundiendo elementos del pop y el folk, ensin abandonar les característiques melódiques y los melismas de la tonada tradicional. La grabación realizóse en directu, xunto con Juan de Dios, ensin cortes nin axustes, pa captar la esencia más auténtica de la pieza.
«LA CARBONERA ye un homenaxe a les muyeres del carbón: carboneres, vagoneres, llampisteres, aguadores, guardabarreres y munches otres que, en numberoses ocasiones, desempeñaben llabores nel esterior, pero que tamién trabayaben dientro de la mina, anque mientres munchos años nun se-yos reconociera dicha llabor. Anguaño, el vientu sopla a favor por elles».
Amás d'esti llanzamientu, Marisa abrió una convocatoria pública para recoyer semeyes y hestories reales de muyeres de la minería. El material recoyíu va formar parte del videoclip oficial de La Carbonera, que va estrenase'l próximu 30 de mayu y el plazu para la recepción de los materiales ta abiertu hasta'l 23 de mayu al traviés d'esti formulariu. Con esta iniciativa, la cantante pretende dar visibilidá a aquelles muyeres que, davezu, fueron apostraes a un segundu planu, y da-yos la reconocencia que merecen dientro de la memoria colectiva.