La XXXI edición de la feria'l llibru uvieína Libroviedo tendrá llugar del 21 al 25 de mayu na cai Pelayo, al propiu mercáu súmense una montonera d'actividaes empobinaes al fomentu de la llectura
21 may 2025 . Actualizado a las 11:12 h.La cai Pelayo, xunta’l Teatru Campoamor, ye l’escenariu nel que va tener llugar una nueva feria primaveral del llibru na ciudá d’Uviéu. Libroviedo algama la so XXXI edición con un programa cargáu d’actividaes pa toles edaes, del miércoles 21 al domingu 25 de mayu, amás del propiu mercáu nel que participarán 13 entidaes del ámbitu llibreru. El programa inclúi firmes de llibros, recitales, cuentacuentos, visites guiyaes a museos y biblioteques, esposiciones, talleres, charres y un homenaxe especial al poeta Ángel González.
Esti añu sedrán 11 les llibreríes uvieínes que participarán na cita, a les que súmense l’Universidá d’Uviéu y una invitada d’escepción, la llibrería mierense La Pilarica. A templos lliterarios col percorríu históricu de Cervantes, Aldebarán o Elías, por exemplu, xúnense esti añu otros proyectos más nuevos como puen ser Matadero Uno, Kafka&Co o Hangar Rebelde. Esta diversidá de propuestes ye motivu de festexu pal públicu en xeneral pero tamién pa la propia industria del llibru.
El fechu de que xente mozo decídase a montar un llocal centráu na venta de llibros nun fai más qu’amosar la voluntá de resistencia del negociu, amás de dar fe d’un relevu xeneracional efectivu nel ámbitu llibreru. Esta ye una esmolición habitual a la hora de falar de llectura nestos tiempos d’hipervelocidá y economía de caracteres. Si bien ye cierto que los medios dixitales van garrando caldía más puxu, el llibru en papel sigue mui vivu y esti tipu d’iniciatives nun faen más que demostralo.
El programa completu d’actividaes y el llistáu de llibreríes participantes tán disponibles na web de Libroviedo.