Los alcuentros qu?organiza Cultura Xixón tendrán llugar del 28 de mayu al 13 de xunu col oxetivu d?incentivar l?intercambiu y la reflexón na escena asturiana: equí la programación completa
21 may 2025 . Actualizado a las 11:11 h.El pasáu xueves 15 de mayu presentóse nel Centru de Cultura Antiguu Insititutu (CCAI) el programa de la XIII edición de los Alcuentros de Músiques Asturianes. El ciclu, qu’abrirá con un conciertu d’Anabel Santiago, tá impulsáu pola Conceyalía de Cultura del ayuntamientu de Xixón, el Taller de Músicos de la Fundación Municipal de Cultura y la Oficina de Normalización Llingüística de Xixón.
El formatu de los Alcuentros respuende a una voluntá pernidia d’incentivar el diálogu ente distintes corrientes musicales de la tierra, dende lo tradi a les músiques d’anguaño. Pa ello concrétense varies cites a lo llargo de tres selmanes, col enfotu de poner en contactu voces consagraes con otres más nueves y tamién preocupándose de venceyar lo llariego a les influencies internacionales. Amás de los conciertos y l’aspectu puramente musical, tamién habrá otres actividaes como xuntances de baille, presentaciones de llibros y alderiques temáticos, too ello repartío ente’l CCAI y el Muséu Casa Natal de Xovellanos.
La primer sesión de los Alcuentros sedrá’l miércoles 28 de mayu a les 19.30 nel patiu del CCAI. Anabel Santiago y la so banda habitual tendrán como acompañamientu de gala a un grupu de pandereteres qu’arropará esa tarde a la cantante na so particular propuesta de mestizaxe musical. El xueves 29 a les 19.00 el salón d’actos del CCAI acoyerá un alderique tituláu “Miraes de muyer na música asturiana”. Les artistes Mapi Quintana, Sandra Díaz y Raquel Vega falarán d’esperiencies propies p’abrir tema alrodiu de la presencia (o ausencia) femenina y de la so visibilidá dientro del panorama musical asturianu, con Claudia González moderando l'alderique.
El miércoles 4 de xunu a les 19.00 sedrá'l turnu del tríu instrumental Picarós. Esti grupu de reciente formación sedrá l’encargáu de compartir el so repertoriu orixinal cargáu de sones celtes y bailladeros, nel espaciu del Muséu Casa Natal de Xovellanos. El xueves 5 Leticia Baselgas cuntará cola compañía de Llorián García y Alicia Álvarez pa presentar el llibru «Diarios d’una panderetera», nel patiu del CCAI a les 19.30. La panderetera y cantante del grupu de post-folk L-R amosará nesta ocasión la so faceta d’ensayista con un testu únicu que yá pue considerase referente filosóficu-sociolóxicu pa entender lo tradi a nivel identitariu nel sieglu XXI.
El 11 de xunu, miércoles, el grupu Cubasturia Jazz ufrirá un conciertu a les 19.30 nel patiu del CCAI. El cuartetu amiesta cantares asturianos con arreglos cubanos nuna propuesta qu’afonda na rellación ente la islla caribeña y el territoriu llariegu dende’l respetu y el ciñu mutuu. La última sesión d'esta XIII edición del ciclu Alcuentros de Músiques Asturianes XIII tendrá llugar el vienres 13 de xunu nel patiu del CCAI. La tarde en danza entamará a les 20.00 cola propuesta del grupu Soi Panderetera pa siguir cola actuación de Rollu Folk que pondrá’l ramu a partir de les 21.30.