Fran Allegre: «Ha normalizase la rellación y el sofitu ente los pocos o munchos falantes, autores y editores de tol territoriu falante»

Fran Allegre (1977) ye escritor, músicu y artesanu riberanu, llionés de Villareiyu d’Órbigu, amorláu pola cultura’l país y pola naturaleza, que como escritor tien espublizaos trabayos etnográficos pola Academia de la Llingua Asturiana como La cultura del vinu en Villareiyu d’Órbigu y Santibañez de Valdeiglesias (2004), Fiestas nel pueblín de Villareyu d’Órbigu (2007) y La pesca en dalgunos pueblos riberanos del Órbigu (2015). Cola editorial Llibros Filandón editó Poemas pa nun ser lleidos (2008) y apaez en delles antoloxíes poétiques, como Esto no rima (Origami, 2012), Onde la palabra pousa (Suburbia, 2012) y en Surdiversu (Cuatro Gotes, 2024).

Tien asoleyaos tamién la obra de teatru: Sentir, y nun sentir sentire (2012) y el poemariu Deixando’l cuerpu (2015). Na parte musical tien editaos Nel Briezu (2011), Nel Caminu (2016), y otras collaboraciones, como Son de ribera o'l discu de la gaita en Llión, Farrapos, furacos, y foles (Música con Tsume, 2013). Agora, asoleya «La fin y outras cousas que van sele», que presenta esti mesmu vienres en Xixón a les 20:00 hores nel Bolboreta Bar.

—¿Qué va atopar el llector en «La fin y outras cousas que van sele»?

—Va alcontrar sentires sobre «La fin», un apocalipsis que nun ye como'l de San Xuan, sinón que va sele, agónicu. Tamién sentires d'otres coses que nun quixéremos que fueren sele, como l'amor, que ye, pa mi, escarduzu, si nun escapa, escapo yo dél, con rellativización de sentimientos, refugando de tolo que nun ye eterno, por creyelo más irreal, inesistente o falsu, cosa que ye un erru porque la esistencia nun microsegundu ye esistencia, anque dalgunos, o la mayoría de los seres queramos parar de viaxar en cambéu p'alcontranos nun llugar de paz inalterable. Tamién hai dalgún gómitu. Gómitos de los qu'uin traga y espulsa ensin remediu, como un poema. Tamién dalguna descripción que s'amece colo inalterable.

—Una de les novedaes del llibru ye que lleva códigos QR cola to propia voz recitando, ¿qué ufre al llector esa esperiencia?

—El qu'el llector se faiga escuchante, que sienta'l poema cola mio emoción y pallabres, pienso que ye muncho más cercano. Otru planu onde'l poema s'arima a emburriar al oyente cola fuercia que vien del llatir del corazón.

—¿Como ta l'idioma, l'asturllionés, nos territorios de Llión?

—L'idioma ta como los planos de les riberes llioneses, como les xaronques, los pexes sanos, los árboles del país, les vaques, la curiosidá por deprender o contemplar un páxaru. Cuando muertu'l perru, acabó la rabia. Veníi y velo.

—¿Y la lliteratura que se ta faciendo per ellí?

—Toi un poco despistáu colo que se fai en Llión, sé que dalgunos autores n'asociaciones como Faceira saquen llibros de mitoloxía, otros de vocabulariu, pa rapaces, o d'otros temes, y sigue habiendo autores, pongamos por casu, pa L.laciana... Nun se muncho, quiciabes tea metíu nun llugar onde nun oigo bien o nun miro pela ventana.

—¿Qué significa pa ti espublizar n'Asturies?

—Espublizar n'Asturies ye normalizar un sofitu ente autores y editores de la llingua nun territoriu que reconozo como la mio casa. L'apueste pola nuesa llingua ye dalgo que puede acabase dende los falantes y autores enantes de la so muerte y que, si acaba, camudarálos n'otra cosa. Ha normalizase la rellación y el sofitu ente los pocos o munchos falantes, autores y editores de tol territoriu falante, porque si non, pienso que la merma ye más rápida. Hai un problema, dalguna vegada por arguyu sobre too, de poner nomes llimitantes a la llingua, yo nun tengo problema en falar de la propuesta de Arias y llamalo Ástur, pol orixe y devenir de la hestoria, pero paezme que puede más lo político que dixebra que lo científico que nos xune, y que ye lo que ye, porque lo dicen los que más saben. Los filólogos dedíquense a estudiala. Si se fíen de mi, que faigan lo que quieran, pero ye como entruga-y a Iker el de la tele cómo ye esto del cambéu climáticu. Hai que facer casu de los estudios y científicos que nun tan mediatizaos o con intereses, qu'en dalgunos temes, pienso que nuna mayoría, esa xente sano son un 95% tando d'alcuerdu.

—¿Qué van sentir los asistentes al actu que celebres en Xixón esti vienres?

—Como nomo yo la poesía: «La poesía ye la espresión escrita d'un calláu glayíu. Una escrección, dalgo inevitable como'l sudu cuando fai calor o'l sangre que mana d'un corte fondu. Sentirán la emoción de los cambeos vivíos por mi, la mio percepción de la vida y de la muerte, el sentir de ver la evaporación de la guapura y dalgún intentu de desplicación de lo vivío».

---

---