L'Arguyu Llocu toma Xixón esti domingu nuna xornada festiva dedicada a reivindicar la diversidá mental
AGORA
Ye un movimientu social de calter internacional que vien trabayando mientres les últimes décades por valtar el tabú alrodiu de la salú mental
23 may 2025 . Actualizado a las 05:00 h.El domingu 25 de mayu Xixón va acoyer una xornada de concienciación col envís de visibilizar, reivindicar y festexar la diversidá mental. Les asociaciones Hierbabuena (salú mental en primera persona) y Abrazos Verdes Asturies (prevención y acompañamientu a víctimes de suicidiu y persones allegaes), dambes dedicaes a la concienciación en materia de salú mental nel ámbitu asturianu, encabecen la convocatoria.
La primer parada del día va ser a les 12.00 na escalera 15 del paséu de San Llorienzo, onde va tener llugar un actu reivindicativu y d’onde saldrá’l pasucais que va percorrer el paséu de la playa espardiendo la pallabra lloca. Les activiades posteriores tendrán llugar nel espaciu Les Cigarreres, onde va haber una sesión vermú, xinta, micro abiertu, sesión DJ y más actividaes pa esfrutar espresando y festexando la diversidá mental.
L’Arguyu Llocu ye un movimientu social de calter internacional que vien trabayando mientres les últimes décades por valtar el tabú alrodiu de la salú mental. Al mou del Arguyu Gay, esta iniciativa busca valtar llendes y prexuicios p’algamar una igualdá efectiva ente les persones. Nel llugar privilexáu de la heteronorma ponse nesti casu embaxo’l focu al «cuerdismu», que nun ye otro que’l reduccionismu socialmente aceptáu que supón considerar lo cuerdo como l’únicu paradigma válidu en sociedá. Lo cuerdo ye lo sano equipao a lo normal y a lo deseyable, poniéndolo perriba de les munches diversidaes mentales que suponen parte de la bayura intrínseca de la condición humana.
Nesti sentíu, trátase d’una apropiación del conceptu de llocura como condición mental pola que sentir arguyu. Ello sirve pa superar y sovertir esi calter tradicionalmente peyorativu, emponderando a les persones que primero cargaben cola etiqueta de lloques y que, caldía más, atopen na so condición otru motivu pa reivindicar cambeos sociales colos que superar l’estigma, la medicalización, los tratamientos farmacolóxicos y otros medios clásicos de la psiquiatría clínica que busquen tratar síntomes y non arreglar los problemes qu’hai detrás.
La llucha pola salú mental tá garrando puxu nos últimos tiempos gracies, ente otros axentes, a asociaciones ensin porgüeyu económicu como son Hierbabuena o Abrazos Verdes, pero tamién a proyectos como Banksyastur, que lleva varios años removiendo conciencies peles redes sociales y con iniciatives como’l calendariu solidariu Pola Salú Mental. Esti tipu de propuestes sirven p’averar la problemática de la salú mental a la ciudadanía. Anque mui davezu se piense como dalgo ayeno, lo cierto ye que toles persones tamos en riesgu d’esclusión por ser tachaes de lloques, independientemente de cómo considere cada cual el so estáu mental. Y pa eso, envede recibir esa etiqueta por imposición, hai quien prefier reafirmase nel refugu a la norma impuesta. Porque ufrir soluciones individuales a problemes colectivos nun alcanza, pero dende la individualidá pue reivindicase una colectividá más amable y vivible pa toles persones que l’integren, seya cual seya la so condición mental.