El CMX, el SNL Xixón y hhopcast convoquen pal 14 de xunu la primer competición d'esti tipu enteramente n'asturianu
23 may 2025 . Actualizado a las 14:11 h.El proyectu, qu’entamen a comuña’l CMX (Conseyu de la Mocedá de Xixón), el SNLX (Serviciu de Normalización Llingüística de Xixón) y la plataforma, tá pensáu como rempuesta a ún de los intereses que la mocedá asturiana venía reivindicando con más puxu. Trátase d’un certame dirixíu a MC’s de 14 a 35 años que tengan un mínimu de 3 temes propios y un interés manifiestu n’afondar na consolidación de la cultura hip hop n’asturianu.
Les batalles, que son la parte central del certame, van tener llugar el 14 de xunu en Cimavilla nel Auditoriu Dr. Francisco Rodríguez Xovellanos a partir de les 18.00. Ellí hasta un total de 20 participantes van ufrir les sos meyores rimes n’asturianu pa ver quién se fai con caún de los 3 premios:
- Primer premiu: 300€ + distribución dixital del tema por Músic[a]sturiana
- Segundu premiu: 200€ + productu de Puru Remangu
- Tercer premiu: 100€
La participación nel concursu ye de baldre y anque ye necesario inscribise, el plazu va tar abiertu hasta’l mesmu día del eventu. Al marxe de la edá, la principal cláusula que pue torgar la participación nel certame xira alrodiu de los discursos d’odiu. Nun van permitise lletres con conteníu qu’incite o promueva’l fascismu, la xenofobia, el machismu, la homofobia, la transfobia, el capacitismu o cualquier otru discursu discriminatoriu qu’ataque a cualquier colectivu minorizáu o en riesgu d’esclusión.
El CMX y el SNLX y la plataforma hhopcast cuenten amás pa esti proyectu col sofitu de Puru Remangu y Music[a]sturiana, dos empreses conocíes pol so llabor de normalización llingüística siempres venceyáu al empoderamientu de la cultura d’Asturies. Si se quier ampliar información pueden consultase equí les bases de participación o acudir a les redes sociales de hhopcast.