Les presiones a cuenta del conflictu de Les 6 de La Suiza estiéndense al grupu de sofitu
AGORA
El grupu de sofitu a Les 6 de La Suiza llanza un comunicáu nel que denuncia la presión policial carecida por varies compañeres
05 jun 2025 . Actualizado a las 17:33 h.El grupu Sofitu a Les 6 de La Suiza denuncia públicamente l’acosu policial carecíu por varies compañeres la tarde del 4 de xunu. Les activistes fueron identificaes y rexistraes la tarde del 4 de xunu en Xixón mientres colocaben pancartes reivindicatives ensin causar ningún tipu de dañu a instalaciones públiques o privaes. Efectivos d’uniforme y de paisanu procedieron a rexistrar el vehículu y requisaron parte del material, amenazando a les activistes con supuestes acciones xudiciales. Esto supón un nuevu pasu na política de acosu y derribu exercida sobre l’entornu cercanu de les 6 sindicalistes condergaes a prisión, estendiendo les presiones a tol movimientu social qu’esixe la so llibertá.
El grupu de sofitu llanzó un comunicáu nel qu’afirmen:
«Calificamos esta intervención policial como un exerciciu inxustificable d'acosu, presión y amenaces a llibertaes ciudadanes básiques, como les d'espresión y circulación. Daquién ordenó una vuelta de tuerca más nel procesu de represión de l'actividá sindical, asina qu'agora escuérrese non yá a quien exerce derechos sindicales sinón tamién a les compañeres que les sofiten».
Y añaden:
«Consideramos que tolos esfuerzos gubernamentales nesti asuntu tienen de dirixise agora, non a aumentar el númberu de ciudadanes reprimíes por defender los derechos sindicales, sinón a xestionar un inmediatu tercer grau pa cuando encarcelen a Les 6 de La Suiza y un indultu urxente.
Ésa ye la solución política, ética y xusta al conflictu. Porque lo contrario, l’aumentu de la represión, namás va xenerar más respuesta social y a allargar un conflictu que toes, Gobiernu y trabayadores, tenemos la obligación de solucionar».