El personal del centru convoca una concentración el sábadu a les 9.00 énte les instalaciones del centru p'aparar una decisión que consideren inxustificada
13 jun 2025 . Actualizado a las 18:40 h.El personal emplegáu nel Centru San José de Sotrondio, dedicáu a l'acoyida y a la inserción de reciella y xuventú migrante ensin acompañamientu familiar, recibió ayeri la noticia inesperada del pieslle inmediatu de les instalaciones. Esta decisión, según se-yos comunicó a les trabayadores del centru, tómase dende’l propiu gobiernu d’España y vien motivada polos resultaos d’un supuestu informe que conclúi que’l mal estáu de les instalaciones obliga al pieslle de les mesmes y, poro, al treslladu inmediatu d'usuarios. Los 83 nenos, nenes y xóvenes qu’allugaba esti centru sedrán recolocaos en distintos macrocentros madrilanos. Del futuru llaboral de les 15 trabayadores, nada nun se sabe.
«La mañana del martes sonó una alarma, como la del recréu, non la d’emerxencia, pero a deshora», afirma’l personal del centru. Procedióse a vaciar l’edificiu y vinieron los bomberos, pero nada más nun pasó. A la tarde, recibíen la comunicación: el Ministeriu ordena’l pieslle del centru dáu’l mal estáu de les instalaciones. Ensin más xustificación, nin plazos, nin notificación formal, nin soluciones pal personal.
Esta decisión, de facese efectiva, dexaría ensin trabayu al personal del centru y supondría «un palu tremendu pa los procesos d’inserción de los chavales», torgando dafechu los proyectos de formación y empléu que se taben desendolcando y que consisten, ente otres xeres, na obtención de certificaos de profesionalidá y la busca activa de trabayu. «Tol llabor que se tá faciendo sedría de baldre», afirmen.
A la espera d’una reunión formal coles autoridaes competentes, el personal del centru plantégase un encierru nes instalaciones la nueche del vienres. Esixen «tresparencia, esplicaciones y soluciones» y «la rectificación d’una decisión inxustificada que paez venir de mui arriba». Convócase tamién una concentración esti sábadu 14 de mayu a les 9.00 hores énte les instalaciones del mesmu Centru San José, en Sotrondio, una hora enantes de la prevista pal treslladu de los usuarios.