Yá ta disponible'l Bonu Cultural Mozu 2025, con posibilidá d'invertir en cultura n'asturianu
AGORA
Los beneficiarios son les persones que cumplieren o cumplan 18 años nesti añu
16 jun 2025 . Actualizado a las 11:21 h.El Bonu Cultural Mozu, programa impulsáu pol Ministeriu de Cultura, entama la so cuarta edición. A partir de güei, les persones nacíes en 2007 pueden solicitar esta ayuda de 400 euros que van poder destinase a l'alquisición y esfrute de productos, servicios y actividaes culturales. Pa solicitalo, les persones que cumplieren o vaigan cumplir 18 años en 2025 han rexistrase y realizar el procedimientu de solicitú na web habilitada hasta'l próximu 31 d'ochobre.
El Bonu Cultural Mozu funciona con una tarxeta de prepagu que'l beneficiariu puede tener de forma virtual nel so móvil o recibila de forma física na so casa. Con esa tarxeta puede esfrutar d'esperiencies y productos culturales, que s'estremen en trés categoríes pa favorecer la diversificación del gastu, cola siguiente distribución:
- 100 euros pa productos físicos, como llibros, prensa o discos.
- 100 euros pa productos dixitales, como suscripciones a plataformes, prensa dixital, podcast o videoxuegos en llinia.
- 200 euros p'artes escéniques: teatru, ópera, cine, danza, museos...
Nesti sen, el Bonu Cultural Mozu permite invertir en cultura n'asturianu de diferentes maneres. N'Asturies, llugares como teatros, llibreríes, tiendes de discos, sales de conciertos o museos cunten con productos y elementos n'asturianu que pueden mercase o visitar.