La representación va llegar a Xixón nel mes d'avientu
17 jun 2025 . Actualizado a las 11:14 h.La balada del norte, d'Alfonso Zapico, va convertise nuna obra de teatru que se va estrenar n'ochobre de 2025 en Ponferrada y va tener otres cuatro representaciones enantes d'acabar l'añu. Ente elles, destaca la del Teatru Xovellanos de Xixón los díes 4 y 5 d'avientu. El director Luis Alija ye'l responsable de l'adaptación teatral, que va sintetizar en 120 minutos les casi mil páxines de la tetraloxía de Zapico sobre la revolución minera d'Asturies de 1934.
«Si daqué tien La Balada del Norte ye épica y, teniendo eso en cuenta, dende la épica vamos trabayar la dirección. Como si d'un «viaxe del héroe se tratara, la dirección d'esta puesta n'escena va buscar que l'espectador s'adientre nun viaxe que lu va introducir na hestoria del norte d'España dende finales de 1933 hasta les consecuencies de la Revolución d'ochobre de 1934», asegura Alija, qu'asume la xera d'afaer esta hestoria xunto con un equipu artísticu que va llevar les mines, el monte, les barricaes y la batalla al escenariu; y con un elencu d'ocho actores y actrices.
Según Alfonso Zapico, «La maxa del teatru dexa dar vida a la poesía, a la lliteratura, non tanto al cómic. Poques vegaes arriesgóse una compañía de teatru a recrear una revolución en viñetes. Si daqué ye realmente revolucionario, ye esta audacia escomanada propia de la xente d'escena».
A lo llargo de los sos cuatro volumes, La Balada del Norte somorguia al llector nun detalláu rellatu de la Revolución d'Ochobre de 1934 n'Asturies. Publicada ente 2015 y 2019 por Astiberri Ediciones, esta tetraloxía ye frutu d'una refecha investigación y un fondu respetu pola memoria hestórica. Zapico, galardonáu col Premiu Nacional de Cómic en 2012 por Dublinés, demuestra una vegada más la so maestría narrativq y gráfica, construyendo una trama complexa y personaxes fondamente humanos.