Crónica del Festival VESU 2025: trés díes de música independiente en Güeñu y Uviéu
24 jun 2025 . Actualizado a las 11:23 h.Esta fin de selmana vieno cargada d’eventos n’Asturies. Ente ellos destacó la vuelta del VESU, el festival col ambiente más alternativu del branu asturianu qu’un añu más enllenó Güeñu y Uviéu de música indie, nel sentíu más ampliu de la espresión. Hasta 17 propuestes musicales d’estilos bien estremaos y procedencies mui distintos tomaron los distintos escenarios el vienres 20, sábadu 21 y domingu 23 p’amosar la bayura y diversidá de les músiques contemporánees independientes, venceyaes al pop y al tiempu alloñaes del mainstream. El VESU ye’l festival alternativu al que se va pol bon ambiente y la bona música, pero tamién pol bon facer d’una organización que quier caltener los sos valores respetando lo pequeno y lo cercano, col patrociniu de la marca Vibra Mahou y la financiación d’empreses grandes como ALSA o AC Hotels, pero tovía fuxendo de fondos d’inversión que financien xenocidios y escoyendo un pueblu como ye Güeñu pa montar el gruesu del so eventu.
Un añu más, amuesen que sí ye posible facer un festival sin que seya macro, que pue ufiertase comida de cercanía con empreses pequenes asturianes (ATM Burguer y Nun pases fame), que puen trayese bandes importantes a nivel nacional y otres de fuera ensin arrenunciar al talentu llocal; too esto ye la so forma de dicir: ye posible montar saraos ensin vender l’alma al diañu.
El festival entamó la tarde del vienres 20 nel espaciu rural de Güeñu (La Ribera) de la mano de los xerezanos Nadie Patín qu'animaron al públicu cola so mecedura poprock que va dende’l pop español de los 90 hasta les rancheres o les músiques de raigañu andaluz, too ello xuncío pol so aire skater. Queralt Lahoz llegaba depués cola so propuesta pa facer baillar a les asistentes al son de la so personal propuesta musical de fusión, contemporánea a más nun poder, de la que destaca lo bien qu'empata les influyencies flamenques con fórmules fórmula más venceyables al trap y otres músiques urbanes. Diba ser depués el turnu de la banda británica Porridge Radio, banda d’indie pop que fixo lo suyo metiendo al públicu nel bolsín a güelpe de progresiones melódiques que diben medrando tema a tema dica’l crescendo final. Los Punsetes, cabeza de cartel del día y favoritos del públicu, tomaron l'escenariu por asaltu y fixeron suya la nueche a güelpe d’himnu, con cantares que yá son clásicos y lletres ácedes y sarcástiques, dieron un recital al altor de lo qu’acostumen. La nueche diba pesllala La Güeriata cola so selección de temes pensada pal baille más xabaz, aseguránose de que'l públicu soltare tola enerxía que-y pudiere quedar tres d'una sesión qu'abría'l festival a un Güeñu entregáu.
El sábadu 21 pela mañana l’ambiente del VESU treslladábase a la Plaza Porlier de la capital asturiana. L’Uviéu antiguu acoyía a les artistes de la sesión vermú n’una propuesta bien variada con Lucía Dilema y el so DJ Set más baillable, Bateu Matou, el tríu funk-electro-rock dende Portugal que fixo ximielgar los cadriles a toles asistentes y La BattMobile percorriendo les calles col so espectáculu ambulante de percusión, steampunk y performance d’inspiración tribal… ¡en triciclu!.
La tarde del sábadu, yá de vuelta nel escenariu rural de Güeñu, abrióla l’artista Ana Lua Caiano cola so propuesta única qu’amiesta poesía, electrónica y elementos de raigañu folk portugués. La segunda actuación foi al cargu de Sanguijuelas del Guadiana y la so fusión de raigañu andaluz, rock, rumba y sintetizadores, una sorpresa que non sólo revalida los xéneros que toca, sinón que los reinventa. Yá col atapecer y énte un públicu entregáu foi’l turnu de Pablo Senator, nuevu proyectu del ex Desakato nel qu’acompáñase d’una banda de primerísimu nivel pa ufrir un soníu indie mui curiáu. La so esploración en clave de pop llegó a Güeñu cargada de lletres de calter personal, envueltes nunes llinies melódiques bien potentes al tiempu que delicaes. Tres de l’actuación de Pablo Senator, Mediocre DJ pinchó unos temes estilu mash-up dende l’escenariu llateral ? obra del artista Rodríguez Redondo ? onde acabaría poniendo'l ramu tres de los cabeces de cartel de la nueche. Pero enantes d'eso, y yá de nueche zarrada, la sorpresa diba dala La Battmobile, apaiciendo nel so escenariu rodante sacáu directo del mundu de Mad Max, con un nuevu espectáculu de percusión y danza con fueu. Ensin un minutu pa respirar, el públicu xirábase yá y buscaba los meyores sitios porque l’escenariu principal acoyía a los grandes esperaos de la nueche, el grupu al qu’una xeneración entera de melómanos diba a ver. León Benavente entró a escures porque de la solombra vienen, como una puñalada sónica de los 80 que travesare’l tiempu pa cincase directa na conciencia d’un públicu rindíu énte una setlist que foi progresivamente dende los cantares más nuevos del so discu caberu «Nueva sinfonía del caos», hasta llegar a los hits más famosos de la banda. Temes qu'emburriaron al públicu a baillar alloquecíu ensin dexar de falar sobre hedonismu y conciencia crítica, reflexón y desparrame: estáu civil, de folixa; estatus políticu, de resaca. El grupu formáu por Luiggi, Baos, Verdú y Boba, cola so enerxía inacabable, fixo lo que meyor sabe facer y el públicu tuvo al altor: esa nueche foi valiente y reconoció qu’anque’l día anterior saliere, sintió una estraña euforia y fue… brigada.
El domingu 22 al vermú tovía había ganes de música y foi’l turnu de la coda del festival na Plaza Porlier n’Uviéu. Diskreepo llevóse la contraria a sigo mesmu faciendo que tol mundu tuviere d’alcuerdu n’esfrutar del so bon facer a los platos, l’amor pol vinilu y la electrónica retro marca de la casa. El soníu retrofuturista de Neura fexo de Porlier un escenariu de synthpop ochenteru actualizáu a los soníos urbanos d’anguaño y tampoco faltó’l pop kinki del enerxéticu Delgao pa poner un ramu macarra a la cita. Un vermú al altor del restu del festival, el pieslle perfectu pa trés díes de música indie repartíos en dos escenarios bien estremaos pero compartiendo’l mesmu ambiente alternativu y caro que sí, tol bon rollu del mundu. El VESU volvió a trunfar y a dexar tan bon regustu como siempres.