Son 25.000 les entraes disponibles, con un preciu de 4 euros, pa la XirinZone del Xiringüelu
27 jun 2025 . Actualizado a las 11:33 h.El próximu llunes 30 de xunu, a les 10.00 hores van ponese a la venta les entraes pa la XirinZone del Xiringüelu, qu'esti añu va tener llugar el domingu 10 d'agostu. Van ponese a la venta un total de 25.000 entraes (online y taquilla).
La Confrería del Xiringüelu caltien, una edición más, la división ente la zona más tradicional onde s'asitien les casetes de les peñes, y la XirinZone con música amplificada mientres tol día. La zona de Peñes ye d'accesu llibre y gratuitu pa toa persona que quiera allegase, perteneza o non a una peña.
El preciu de les entraes ye de 4 euros hasta'l domingu 13 de xunetu a les 23:59 hores; de 5 euros a partir del 14 de xunetu hasta zarru de taquilla online; y de 6 euros en taquilla'l mesmu día 10 d'agostu, nos accesos al prau Salcéu. En tou casu, va acutase un mínimu númberu d'entraes pa venta en taquilla, polo que s'encamienta la compra con antelación. Pa ello, la organización habilita la so propia páxina web pa mercar les entraes.
Amás, esti sábadu va facese pública la imaxe de la fiesta d'esti añu, dedicada a la sidra y la cultura sidrera asturiana, xuniéndose a la celebración pola declaración como Patrimoniu Inmaterial de la Humanidá. Va ser nel Bar La Cueva, onde nel añu 1940 empezó a xestase l'espíritu d'esta emblemática fiesta popular en plena posguerra cuando nin n'España nin n'Asturies había munches celebraciones lúdiques y el pueblu taba faltu d'allegría y daqué de diversión.