L'asociación vecinal Esto ye Ciares celebra les fiestes del barriu con un carácter popular y alloñaos de les macrofiestes
09 jul 2025 . Actualizado a las 13:08 h.Ciares va tener fiestes nel branu de 2025, como en tolos branos anteriores. Va ser nel Campu La Cruz y l'asociación vecinal Esto ye Ciares va ser la encargada d'entamar una folixa de carácter popular y que s'alloña de les «macrofiestes» que se vienen dando nos tiempos últimos nes fiestes de barriu de Xixón por ceder la so celebración a empreses encargaes de tola organización. Les fiestes populares de Ciares van tener llugar mientres el 25, 26 y 27 de xunetu nel campu de fútbol del barriu y pel so prau va haber tiempu pa conciertos, pa romería y pa folixa, ensin escaecese de la sestaferia na recoyida del campu, un elementu que, sumáu al restu, fai entá más popular esta fiesta.
El vienres 25 va ser el día (o la nueche) de los conciertos. A les 19 hores, Dinosaurio Meteorito, un grupu mui mozu de Xixón, va ser el encargáu d'abrir la folixa. Yá a les 22 hores, Montefurado va poner a puntu'l campu col so rock, country y folk, mientres qu'a les 00:00 hores va ser el turnu de Tribute Against the Machine, la banda tributu a Rage Against the Machine que va repasar los sos meyores cantares. A lo último, a les 02:00 hores, Ilustres Patilludos, la banda «chigrebilly», va zarrar la primer xornada en La Cruz.
El segundu día de fiesta va ser el de la Romería. Dende les 12:30, les Pandereteres de Ciares van tar tocando delles pieces pal baille y a les 13 hores va dase'l pregón, al cargu de Juan Carlós Díaz, vecín del barriu que recuperó la romería nel añu 1965. Amás, va entregase'l premiu Teyera exemplar 2025 al club Balonmano Gijón. Tres d'ello, va entregase'l bollu y la botella a los socios y entama la sesión vermú con Rollu Folk y la xinta popular. Yá pela tarde, va haber xuegos tradicionales infantiles, taller de baille asturianu y baille popular con Los Muiles.
De nueche, aporta a Ciares la folixa. A les 20:00 hores abre la nueche 6 Riales colos sos ritmos tradicionales, mientres qu'a les 22:00 hores, dende Galicia, aporta la música de Mediarea. Yá a les 00:00 hores, la música fusión vien de la mano de La Tarrancha y a les 02:00 entama la sesión DJ hasta'l zarru del campu. El domingu, tres la folixa, entama dende les 17:00 hores la sestaferia pa recoyer La Cruz.