El remolcador históricu vuelve a la villa mientres les fiestes del Carmen, los díes 15 y 16 de xunetu
10 jul 2025 . Actualizado a las 05:00 h.La Conseyería de Cultura, Política Llingüística y Deporte, el Conceyu de Muros de Nalón ya Industries Ferri S.A. suscribieron un protocolu de collaboración pa que l'emblemáticu remolcador San Esteban, más conocíu como El Vaporín, torne mañana a Asturies pa que la ciudadanía pueda esfrutar d'él mientres les tradicionales fiestes del Carmen, los díes 15 y 16 de xunetu. El protocolu sienta les bases pa garantizar la participación estable del barcu nes celebraciones, según la so integración n'actividaes culturales y turístiques del conceyu.
«Esti acuerdu ye una amuesa del compromisu conxuntu y de la importancia de la collaboración público-privada pa salvaguardar y compartir un símbolu del patrimoniu y de la identidá marinera», destacó la conseyera Vanessa Gutiérrez. Amás, aportunó, el regresu del barcu «ye un actu de reivindicación de la hestoria y la memoria colectiva de San Esteban: recuperar El Vaporín ye celebrar el rellatu compartíu poles distintes xeneraciones que vivieron con esti barcu ancláu nel horizonte más inmediatu».
El protocolu contempla, ente otres midíes, el treslláu añal del barcu dende'l so actual allugamientu en Galicia hasta'l puertu de San Esteban, mesmo que la organización de paseos abiertos al públicu mientres les fiestes. Tamién preve acciones de divulgación empobinaes a poner en valor el patrimoniu históricu del remolcador y el compromisu d'ufiertar a les alministraciones firmantes un derechu preferente d'alquisición en casu de que se plantegue la so venta.