El festival de música estremo Luarca Metal Days 2025 vuelve un añu más a poner a L.luarca nel mapa del metal con bandes del nivel de Sôber, Koma, Legacy of Brutality o Soldier
11 jul 2025 . Actualizado a las 18:09 h.Los festivales de música consolídense cada añu más como ún de los atractivos más cotizaos del branu y anque los eventos masificaos garren toles portaes, siempres hai iniciatives que planten cara a estes máquines trituradores de cultura que son los macrofestivales. Ún d’estos festivales ye’l Luarca Metal Days, que na so edición de 2025 vuelve a tomar L.luarca por asaltu con un cartelu que ye un apueste decidíu pol talentu musical estatal y, cómo non, siempres atentu pa la escena metalera asturiana.
El vienres 11 y sábadu 12 de xunetu, les pistes esteriores del Polideportivu Pedro Llera Losada de L.luarca van acoyer les actuaciones d'un total de 20 bandes que van del hard rock al death metal, pasando pol thrash o’l metal gótico y tocando tola bayura musical qu’hai pentemedies. Encabecen el cartel dos grupos que comparten veteranía, entamando dambos a mediaos de los 90: los míticos Sôber, históricos de la escena heavy hardrockera española, y los irreductibles Koma, groove con aire de gaztetxe con muncha carretera a les espaldes.
El cartelu complétalu una selección de bandes qu’inclúi agrupaciones tan variaes como Azrael, Legion, Lujuria, Argion, Exiler, Vendetta FM o Jolly Joker. La organización nun escaez tampoco la inclusión de bandes de la tierra y la presencia asturiana fadráse notar el vienres 11 cuando los thrashmetaleros Soldier garren l’escenariu y el sábadu 12 cola actuación de los míticos Legacy of Brutality, amos y señores del death metal más brutal, que dirán siguíos del heavy rock d’altu voltaxe de Baja California.
El cartelu completu, la información d'acampada y más detalles sobre’l festival tán disponibles na web oficial del festival Luarca Metal Days.