Los disturbios de Torre-Pacheco: l'agresión real y la última falcatrúa de la ultraderecha española
AGORA
La «cacería d'inmigrantes» organizada la última fin de selmana por distintos axentes de la ultraderecha estatal nel municipiu murcianu de Torre-Pacheco pola paliza a un vecín basóse na difusión d'un videu grabáu n'Almería
17 jul 2025 . Actualizado a las 11:34 h.Los últimos díes tol estáu español mira con esmolecimientu a lo que tá asocediendo en Torre-Pacheco, el pueblu de Murcia nel que la violencia lleva yá 3 díes tomando les cais. La tensión lleva escalando desque'l pasáu miércoles un vecín de 68 años recibiere una cuelma presuntamente de parte de dos xóvenes d'orixe magrebí. El municipiu murcianu, nel qu'estímase que'l 30% de la población tien el so raigañu nel Magreb, tenía yá previamente organizaes patrulles vecinales pa garantizar la seguridá como rempuesta a los conflictos que veníen dándose dende hai tiempu, pero estos últimós díes prodúxose un efectu llamada pa convertir la situación n'un polvorín, alentáu por agrupaciones filofascistes d'otres partes del país. El resultáu foron les «caceríes d'inmigrantes», organizaes col sofitu de distintes agrupaciones polítiques y otres entidaes d'estrema derecha, que dexen yá un saldu de 5 persones firíes y lo menos 8 deteníos.
Actualización
Esta información ha sido actualizada para añadir la versión de Frente Obrero, que puede consultarse en este enlace: Frente Obrero niega que esté organizando persecuciones o cacerías a personas migrantes
La estrema derecha española institucional, nun nuevu episodiu d'incitación al odiu, difundió al traviés de diversos canales un videu de dos persones apalizando a un home mayor como supuestu documentu gráficu de la paliza sufrida pol vecín de Torre-Pacheco. Estes imáxenes, reproducíes tamién por dellos medios de comunicación primero de contrastase la so veracidá, foron la mecha que sirvió pa prender el polvorín de les movilizaciones d'ultras de distintos puntos del país col envís d'organizar «caceríes d'inmigrantes», como ellos mesmos les llamen, nel municipiu murcianu. Agrupaciones como VOX, presidida por Santiago Abascal, Se Acabó La Fiesta d'Alvise Pérez, Frente Obrero de Roberto Vaquero o la empresa de desahucios Desokupa de Dani Esteve, llamaron activamente a les movilizaciones pa estes caceríes xenófobes, faciéndose ecu del videu d'Almería y difundiendo comunicaos, matrícules y información dafechamente falsa.
La sorpresa vieno tarde, porque'l dañu yá taba fechu y los disturbios lleven 3 nueches sescudiendo les cais de Torre-Pacheco. Si bien les investigaciones policiales apunten a que l'agresión al vecín murcianu involucren a persones d'orixe magrebí, esta información nun se tenía cuando s'entamó la voráxine de violencia; el videu que circuló per redes estos díes ye'l d'una agresión sufrida por un home n'Almería nel mes de mayu, al que dos xóvenes españoles apalizaron por vivir na cai y al gritu de «maricón de mierda». Les dos víctimes, tanto la de Torre-Pacheco, como la d'Almería, fixeron comunicaos desmintiendo'l videu. Si bien ye cierto que l'agresión de Murcia ye real, los medios de manipulación emplegaos pa escalar la violencia tamién lo son: unos xóvenes non inmigrantes exerciendo una violencia bien conocida y mui afín al pensamientu de les agrupaciones qu'empleguen esi mesmu videu, amuesa de l'aporofobia y homofobia que defenden, pa esparder el so mensaxe xenófobu y axitar a les mases.
Si bien ye cierto que les tensiones sociales derivaes de la inmigración son un fechu, les movilizaciones d'esti tipu son otra demostración de qu'hai una axenda mui bien marcada y que nun se trata de seguridá ciudadana, sinón de discursu y de supremacía. Nun hubo llamamientu masivu a la movilización pol paisanu d'Almería al qu'agredieron por probe y homosexual, y nada nun se sabría del so casu, de nun ser pola última falcatrúa de la ultraderecha española. Tampoco hubo llamamientos cuando se destapó'l casu, el setiembre pasáu, d'un home de nacionalidá española que violare hasta a cinco trabayadores del campu que taben en situación irregular.
Mentantu, a pocos kilómetros del polvorín, miles de persones migrantes ensin regularizar siguen siendo esplotaes n'invernaderos y plantaciones pa beneficiu económicu d'empresarios que piden hipócritamente la so espulsión mientres s'alineen con partíos políticos d'ultraderecha. Too ello en perxuiciu tamién de miles de persones de nacionalidá española, que vense precarizaes al nun atopar un trabayu dignu, y nes que priende la rabia qu'esparden los filofascistes, mientres esos mesmos empresarios escueyen esclavizar a quien depués va ponese nel focu del odiu nacional: l'inmigrante como fonte de problemes, tanto pa ricos, como pa probes. Y el discursu cala, como s'amuesa colos socesos d'esta fin de selmana en Torre-Pacheco.