La Joven Orquesta Nacional de España entama en Xixón la so xira europea con un conciertu nel Teatru de la Llaboral
AGORA
Un total de 102 mozos y moces músicos de la Joven Orquesta Nacional d?España (JONDE), formación musical del INAEM, ta en Xixón participando nel segundu Alcuentru Anual que tien llugar ente'l 18 y el 25 de xunetu na Llaboral Ciudá de la Cultura
17 jul 2025 . Actualizado a las 22:32 h.Nesta modalidá, los intérpretes, d’edaes ente los 18 y 27 años, preparen l’entamu d’una xira europea que va arrancar col primer conciertu’l 26 de xunetu nel Teatru de la Llaboral, baxo la batuta del director portugués Nuno Coelho. Nesta preparación, cuenten col sofitu de doce docentes d’altu nivel procedentes de orquestes y conservatorios de referencia, tantu d’España como d’otres partes d’Europa.
Trés músicos asturianos bien mozos formen parte d’esti proyectu, que tres del so pasu per Asturies, va llevar la orquesta a escenarios tan destacaos como’l Festival Grec de Barcelona, el Rheingau Musik Festival n'Alemania y el Young Euro Classic de Berlín.
El programa del conciertu en Xixón inclúi obres tan variaes como calidables. Na sesión de la Llaboral van poder sentise pieces como Conciertu de los Elementos: I & II, pieza que ganó’l Premiu Reina Sofía de Composición Musical en 2023, compuesta por Fabià Santcovsky y interpretada pol violinista Francisco Fullana. Completen el repertoriu la Suite Iberia d’Albéniz, con orquestación de Francisco Guerrero, y La consagración de la primavera, d’Igor Stravinsky.
Les entraes pa esti primer conciertu tan a la venta al preciu de 6 euros na Receición de la Llaboral, nel Centru d’Información Turística d’Asturies d'Uviéu y na web laboralciudaddelacultura.com. La Llaboral Ciudá de la Cultura ye un espaciu xestionáu pola Sociedá Pública de Xestión y Promoción Turística y Cultural del Principáu d’Asturies, dependiente de la Conseyería de Cultura, Política Llingüística y Deporte.