El Festival Arcu Atlánticu vuelve a trayer cultura y hermanamientu atlánticu a les cais de Xixón
AGORA
El festival, que va tener llugar del 29 de xunetu al 3 d'agostu en Xixón, amiesta distintes formes d'espresión artística y cultural pa promover el diálogu ente les cultures qu'integren el denomáu Arcu Atlánticu
19 jul 2025 . Actualizado a las 05:00 h.El Festival Arcu Atlánticu de Xixón ye un programa cultural entamáu pola Fundación Municipal de Cultura, Educación y Universidá Popular de Xixón que lleva celebrándose dende 2012 (sacantes los años 2019-2023). Esti añu algama la so X Edición, que tendrá llugar ente’l martes 29 de xunetu y el domingu 3 d’agostu, dambos incluyíos, en distintes llocalizaciones xixoneses y pagando especial atención a espacios públicos como son les propies cais y places de la ciudá.
La programación d’esti añu ufre una bayurosa selección de propuestes de distintos ramos del arte y la etnografía atlántica, dende la tradición a la vanguardia, incluyendo música, danza, teatru, poesía, cine, artes audiovisuales, artes plástiques, artesanía, xuegos tradicionales, oficios artesanales y gastronomía. Dientro d’estes propuestes cabe destacar que’l programa inclúi un abanicu amplísimu de propuestes musicales qu’inclúi artistes como Fillas de Cassandra, José Manuel Tejedor, Alienda, Pandereteros d’anguaño, Ferla Megía o Héctor Braga, ente otres actuaciones.
El festival va cuntar nesta X edición con Portugal como convidáu nel Mercáu Atlánticu d’El Campu Valdés, un espaciu de gastronomía en diálogu con otres tradiciones atlántiques pa difundir la dieta atlántica nel que ampoco nun va faltar la música tradicional portuguesa.
La programación d’esti añu nun se conforma con homenaxear al vecín y vuelve a ser un apueste decidíu pol hermanamientu de les cultures del Arcu Atlánticu con una ufierta amplia que tampoco nun escaez otres actividaes participatives como talleres o degustaciones gastronómiques. Yá ye posible dir abriendo boca y enanchando l’interés primero de qu’entame’l festival, el programa completu y tola información tan disponibles na web oficial del Conceyu de Xixón.