La banda de punk liderada pol artista Frank Carter fixo les delicies del públicu
21 jul 2025 . Actualizado a las 11:26 h.La séptima edición del Tsunami Xixón llegó a la so fin nun añu marcáu pola polémica tres conocese va unos meses la so pertenencia a KKR, grupu d'inversión proisraelí. Sicasí, el festival de Xixón nun se vio afectáu por esta situación, yá que la mayoría de les entraes que l'eventu vende taben axudicaes yá dende entamos d'añu. Eso sí, el públicu amenorgó en númberu esti añu, quiciabes pola coincidencia con otros eventos, como por exemplu'l Boombastic, quiciabes por un cartel que nun s'adaptaba a lo que la xente demandaba.
Seya como fuere, el parque Hermanos Castro esfrutó de dalgunos de los meyores artistes de xéneros estremaos como'l punk, l'indie o rap mientres dos díes. La primer xornada foi un mecigayu d'estilos nel que predominaron Kase.O y Thirty Seconds to Mars, la banda liderada pol polifacéticu Jared Leto que punxo a baillar al públicu xixoniegu mientres hora y media nel escenariu principal VibraMahou.
La segunda y postrer xornada nel festival Tsunami Xixón foi daqué diferente y marcada, sobre manera, pola lluvia a la fin del día. Grupos referentes de la música del estáu como Carolina Durante o Alcalá Norte consiguieron llevantar l'ánimu de los asistentes magar de la temática de los cantares enantes de que'l principal atractivu d'esta edición terminada recién, Sex Pistols, saliera al escenariu. La banda británica llegó con daqué de retrasu, pero escaecióse pronto con temes como 'God save the Queen’, 'Anarchy in the UK' , ‘Liar’, ‘Problems’ o ‘No feelings', amás del particular cumpleaños feliz a Paul Cook, que cumplía 70 años sobre l'escenariu asturianu.
El públicu asturianu espera yá por una edición nueva del Tsunami tres el pieslle d'esta con Me Fritos & the Gimme Cheetos repasando dalgunu de los meyores temes del pop español. El punk nun muerre y revive cada añu nel Tsunami Xixón.