La cuarta edición del Reguerada Fest puxa otra vuelta pol usu del asturianu na empresa y na cultura
AGORA
Como vien siendo vezu, Candás va acoyer esta cita del 14 al 16 de payares
23 jul 2025 . Actualizado a las 14:42 h.La Conseyería de Cultura, Política Llingüística y Deporte abrió’l periodu de solicitúes pa les empreses que quieran participar nel IV Reguerada Fest, que se va celebrar en Candás del 14 al 16 de payares.
Pa poder formar parte del festival, les empreses interesaes tienen que comunicar a la Dirección Xeneral d’Acción Cultural y Normalización Llingüística, primero del 31 d’agostu, la so disposición a participar y los sos datos al traviés del corréu electrónicu dxpoliticallinguistica@asturias.org.
El gobiernu asturianu sigue trabayando na programación d’esta cuarta edición del Reguerada Fest, el festival d’empreses qu’usen la llingua asturiana y la cultura n’asturianu que rinde homenaxe col nome a Antón de Marirreguera, nacíu nel conceyu de Carreño y autor de la que se considera la primer obra lliteraria en llingua asturiana. Esti eventu ufierta a les compañíes la posibilidá de mostrar los sos productos o servicios.
Al traviés d’esti festival, Candás va convertise otra vez en puntu d’alcuentru de disciplines artístiques variaes y del mundu de la empresa y la comunicación los díes 14, 15 y 16 de payares, con una programación que va tar dirixida pa tolos públicos. Nes ediciones últimes, pasaron pel so escenariu músicos como Nacho Vegas, L-R, Marisa Valle Roso o Skama La Rede, y escritores como Sofía Castañón, Berta Piñán o Miguel Rodríguez Monteavaro, amás d'una montonera d'iniciatives culturales, performances y esposiciones.