La iniciativa va pasar per once conceyos asturianos
26 jul 2025 . Actualizado a las 05:00 h.La Dirección Xeneral d'Axenda 2030 pon en marcha esti branu'l primer ciclu de cine al aire llibre inspiráu nos valores de l'Axenda 2030: Cine de branu. Porque naide ye más que naide, pa que naide quede atrás.
Esti programa, gratuitu y abiertu a tolos públicos, va percorrer diez localidaes coles mires d'averar l'Axenda 2030 a la ciudadanía al traviés del esfrute compartíu de películes accesibles, emocionantes y socialmente comprometíes. Cine de branu busca espublizar al traviés del llinguaxe universal del cine les trés pilastres fundamentales de la sostenibilidá social, medioambiental y económica— per aciu una mirada crítica y esperanzadora sobre los retos qu'encara la sociedá.
El ciclu, plantegáu como una propuesta cultural pa dinamizar la vida comuñal en zones rurales y fomentar l'accesu universal a la cultura, alliniar con dellos de los Oxetivos de Desenvolvimientu Sostenible (ODS) como la educación de calidá (ODS 4), la igualdá de xéneru (ODS 5), el trabayu dignu (ODS 8), l'amenorgamientu de desigualdaes (ODS 10), o la paz y la xusticia (ODS 16).
El programa va inaugurase'l próximu llunes, día 28 de xunetu, cola proyección d'O los trés o nengunu nel Platillo Skate de La Pola Llaviana. Va siguir con proyecciones el martes 29 en La Pola (L.lena) y el miércoles 30, en Grau. N'agostu, el ciclu retomaráse'l día 4 en Teberga, el 5 en Muros de Nalón, el día 6 en Colombres, el día 11 en Piloña y el 12 en Salas. Les sesiones de zarru van ser n'Ibias, el día 19, y n'A Veiga, el 20.
«Cine de branu ye más qu'un ciclu de películes; ye una apueste por una Asturies qu'escucha, curia y tresforma, y por una Axenda 2030 que se comparte al calor d'una nueche de branu», valoró'l director xeneral d'Axenda 2030.
Toles películes fueron escoyíes coles mires d'ufiertar una esperiencia cinematográfica calidable, con hestories humanes que conviden a pensar y a empatizar, ensin arrenunciar al esfrute. Cada proyección ye una oportunidá p'abrir conversaciones sobre'l presente y el futuru común, en clave de derechos, xusticia y sostenibilidá:
-El maestru que prometió'l mar (España, 2023). Una hestoria real sobre un maestru republicanu que reivindica la educación como palanca de tresformamientu social, na que se destaca'l papel del maxisteriu, la memoria democrática y los derechos humanos. ODS venceyaos: 1, 4, 5, 10, 16.
-La familia Bélier (Francia, 2014). Una comedia sobre inclusión, diversidá funcional, mocedá rural y vocaciones artístiques qu'amuesa la tensión ente los cuidos y los suaños individuales. ODS venceyaos: 4, 5, 10, 12.
-O los trés o nengunu (Francia, 2015). Una epopeya familiar marcada pol esiliu, la resistencia y la esperanza, que conecta colos valores de la democracia, los derechos humanos y l'acoyida. ODS venceyaos: 3, 4, 5, 8, 10, 16.
-La xaula dorada (Francia, 2013). Una comedia costumbrista sobre la vida cotidiana d'una familia migrante que trata sobre'l enraigonamientu, les relaciones llaborales y la dignidá del trabayu. ODS venceyaos: 4, 8, 10.
-Sufraxistes (Reinu Uníu, 2015). Una narración sobre la llucha histórica polos derechos de les muyeres que repasa cuánto se conquistó y cuánto queda por conquistar. ODS venceyaos: 1, 5, 8, 10, 16.