Los asistentes esixeron el treslláu de la iniciativa hostelera a una zona de Xixón menos tensionada
25 jul 2025 . Actualizado a las 11:46 h.«¡El Paseo Gastro danos mucho asco! »o «¡El botellón, en casa de Moriyón!», ensin escacer« ¡El Paseo Gastro para Hermanos Castro!» fueron dalgunes de les conseñes que los asistentes a la manifestación d'ayeri en Cimavilla glayaron a lo llargo y ancho de la cai Claudio Alvargonzález, llugar nel que, previsiblemente, va afitase'l Paséu Gastro que la corporación de Carmen Moriyón creó. Dende la casa Conceyu, naide respuende a les sos reclamaciones.
Esta reivindicación vien dada pola llocalización d'esti paséu, nuna zona tensionada pola creciente afluencia de turistes y nun barriu que sufre acaldía les sos consecuencies, con xentrificación y una degradación constante de la zona hestórica de la ciudá, lo que se traduz nunes condiciones pésimes pa los sos vecinos. La marcha salió de la icónica Casa del Chino a les siete de la tarde, espaciu onde l'asociación de vecinos tien afitada la so sede, con destín a la Plaza Mayor, nuna manifestación na que participaron vecinos del barriu, pero tamién simpatizantes y figures polítiques como Javier Suárez Llana (Izquierda Xunida) o Olaya Suárez (Podemos), anque la mayor representación foi la del grupu municipal del PSOE, con Jacobo López, Carmen Eva Pérez Ordieres y Rodrigo Sánchez.
Nun foi esta la única reivindicación que los vecinos del hestóricu barriu de la villa glayaron. Criticóse también al conceyal de Tráficu, Movilidá y Tresporte Públicu, Pelayo Barcia, poles nules opciones qu'ufre la empresa municipal de tresporte al barriu altu, mesmo que les torgues de desplazamientu que va causar el Paséu Gastro na zona. Yá delantre de la casa conceyu, esixéronse más inversiones nel barriu, más servicios pa la población enveyecío y polítiques efectives escontra la xentrificación y la invasión turística, amás de los glayíos de« ¡Queremos un barriu pa vivir!» o «¡Cimavilla existe!».