Puenticine, la iniciativa que llucha escontra la despoblación rural dende'l séptimu arte
AGORA
El pueblu de Ponticiella va acoyer esta muestra ente'l 1 y 3 d'agostu, con proyecciones, charres y presentaciones
29 jul 2025 . Actualizado a las 13:17 h.Mientres la primer fin de selmana de agostu, la pequeña aldega de Ponticie??a, nel conceyu de Cangas, va dexar per unos díes la so habitual tranquilidá pa tresformase nun puntu d'alcuentru ente'l cine y el mediu rural. La cita ye con Puenticine 2025, una amuesa cinematográfica qu'algama la so tercer edición con un lema tan directu como necesariu: «una mirada escontra la despoblación rural».
Lloñe del xaréu de les grandes sales o los festivales masivos, Puenticine álzase como un abellugu cultural que reivindica la vida nos pueblos al traviés de la pantalla, y lo faen con una programación pensada al detalle, que combina curtiometraxes, llargometraxes, documentales, lliteratura, fotografía, gastronomía local y espacios de conversación en comunidá.
El vienres 1 d'agostu arranca la programación cola inauguración de la esposición fotográfica Tristesse y la proyección del curtiumetraxe Las cosas del Bus, obra del cineasta local José Luis Cuendía. Darréu, va esibise'l llargumetraxe que da nome a la esposición, Tristesse, dirixíu por Emilio Barrachina, natural de Salas. Dambes proyecciones van acompañase d'una cena informal a base de productos de la contorna, dando pasu a una charra-coloquiu que se va allargar hasta la madrugada.
El sábadu 2, el cine cede temporalmente'l so llugar a la palabra escrita cola presentación del llibru Historias, Fotografías y Lugares desde Cangas del Narcea, d'Enrique Rodríguez, que convida a redescubrir el conceyu al traviés de la imaxe y la memoria. Esa nueche va ser la vez del curtiumetraxe d'animación Qué hacen los Lego cuando no estoy en casa, una propuesta fresca y lúdica del mozu realizador Alejandro Murias, y del documental Buñuel, un cineasta surrealista, dirixíu por Javier Espada, que traza la semeya d'unu de los grandes del cine español. El coloquiu nocherniegu va repitise como zarru de xornada.
La clausura, el domingu 3, va dir más allá de les butaques y les pantalles, con una visita guiada a les bodegues de la zona, incluyendo la tradicional bodega La Verdea, una esperiencia que conecta'l patrimoniu material ya inmaterial del territoriu. La xornada final va incluyir la proyección de La fabulosa curva al equilibrio, curtiumetraxe de Graciela Mier, presidenta de l'Academia de Cine d'Asturies, quien tamién va tar presente nel actu de clausura. Como broche, va esibise Ahiquí tamos: la voz d’un llugar, un documental que recueye'l testimoniu colectivu de la vida rural, producíu pola Asociación Cultural El Bail.-y de Cangas.